У Беларусі пачаўся сезон актыўнасці кляшчоў

З небяспечнымі паразітамі  можна сустрэцца не толькі ў густых лясах, але і гарадскіх парках. Медыкі папярэджваюць, што яны з'яўляюцца ўзбуджальнікамі сур'ёзных захворванняў. Пры выяўленні кляшча на целе неабходна неадкладна выцягнуць яго  і адвезці ў лабараторыю. Як абараніць сябе  падчас загараднага адпачынку - распавядзе Святлана Чарнова.

Збіраючы маладую крапіву ў Мінскім раёне, Канстанцін Хрусталёў упершыню стаў ахвярай, здавалася б, зусім непрыкметнага жучка - кляшча. Нечаканага госця на сваім целе мінчанін заўважыў толькі на наступны дзень. Клешч аблюбаваў месца пад каленам. Прыйшлося выдаліць пры дапамозе ніткі і неадкладна адвезці на даследаванне.

Як аказалася, менавіта на гэты перыяд (канец красавіка - пачатак мая) прыпадае першы пік актыўнасці кляшчоў. Паразіты, якія толькі абудзіліся пасля зімовай спячкі, ахвотна шукаюць сабе ежу. Згодна са статыстыкай, каля 50 тысяч чалавек у нашай краіне штогод становяцца ахвярамі такіх агрэсіўных жучкоў, якія, дарэчы, пераносяць небяспечныя захворванні. І самае распаўсюджанае - барэліёз або хвароба Лайма. 

Спецыялісты гавораць, каб пазбегнуць прыкрых наступстваў і своечасова пачаць лячэнне, калі клешч усё ж выяўлены, яго неабходна акуратна зняць пры дапамозе ніткі або спецыяльнага прыстасавання для выдалення кляшчоў, якое можна знайсці ў аптэках. Далей  як мага хутчэй аднесці ў лабараторыю на даследаванне. А сустрэцца з павукападобнымі паразітамі, між іншым, можна не толькі ў густых лясах, але і гарадскіх парках. Як правіла, яны любяць адпачываць сярод кустоў і высокай травы.

Яны чапляюцца за сваю ахвяру пры дапамозе маленечкіх кручкоў, размешчаных на лапках. 

Каб абараніць сябе ад кляшчоў, адпраўляючыся на прыроду, разумна выбраць адзенне, якое шчыльна прылягае да цела. Пры гэтым світар, вадалазку, майку трэба запраўляць у штаны, штаны  ў шкарпэткі, а таксама варта зашпіліць манжэты на рукавах. І абавязкова галаўны ўбор. Сама надзейна ў гэтым выпадку выбраць куртку з капюшонам. 

А вось на дачных участках у мэтах прафілактыкі нападу кляшчоў варта скошваць высокую траву, а да зімы  поўнасцю прыбіраць сухое лісце, каб для небяспечных жучкоў не знайшлося месца для зімоўкі.