Святкаваць яго будуць з новым архітэктурным сімвалам. 2 ліпеня ў Мінску пройдзе ўрачыстае адкрыццё плошчы Дзяржаўнага флага. А ў Дзень Незалежнасці, 3 ліпеня, самыя відовішчныя падзеі будуць разгортвацца ў цэнтры сталіцы. Да свята рыхтуюцца не толькі вайскоўцы, але і спартсмены. І калі ў першым выпадку стаўка на сталёвую моц, то ў другім - на маладосць і грацыю.
Зразумела, галоўныя моманты да апошняга трымаюцца ў сакрэце, але сёе-тое нашаму карэспандэнту Канстанціну Прыдыбайлу ўсё-такі ўдалося ўбачыць.
Да Дня Незалежнасці Рэспублікі Беларусь застаецца ўсяго два тыдні, рэпетыцыі спартыўна-маладзёжнага шэсця ідуць поўным ходам, рэжысёры абяцаюць яркае і незабыўнае відовішча.
Галоўная тэма шасціхвіліннага нумара - спорт. Яго гісторыя - ад першага запаленага алімпійскага агню да нашых дзён. Юныя танцоры таксама пакажуць і развіццё спорту ў нашай краіне, значныя перамогі і дасягненні. Не застанецца ўбаку і чэмпіянат свету па хакеі, які наша краіна прыме ў наступным годзе. Але гэта ўсё 3 ліпеня, пакуль жа ідуць рэпетыцыі ў Футбольным манежы.
Шматгадзінныя рэпетыцыі ідуць кожны дзень, памылка аднаго ўдзельніка шоу прывядзе да разбурэння ўсёй карціны. Ужо больш як месяц ідуць трэніроўкі, кожны рух даводзіцца да аўтаматызму.
Вячаслаў Панін, галоўны рэжысёр маладзёжна-спартыўнага шэсця да Дня Незалежнасці Рэспублікі Беларусь: У шэсць хвілін усё не змесціш, прыйшлося скараціць, там жа будзе яшчэ і ваенная тэхніка, цывільная. Відовішча будзе вялікае. Гэты эпізод як фінальная кропка.
На грандыёзным свяце па традыцыі знойдзецца месца і праслаўленым спартсменам. Алімпійскія чэмпіёны праедуць у спецыяльным аўтамабілі.
Удзельнікі не сумняваюцца ў тым, што атрымаецца відовішчнае шоу, а вось рэжысёры вырашылі не раскрываць карты. Прапануюць самім прыйсці на трыбуны ці хаця б уключыць тэлевізар. Многія сцвярджаюць, што такога роду мерапрыемствы менавіта па тэлевізары глядзяцца значна лепш, чым ужывую. Галоўны рэжысёр двух святаў прапаноўвае параўнаць карцінку.
