Мінская вобласць у гэтым сезоне плануе атрымаць добры ўраджай яблыкаў. Усяго больш за 30 тысяч тон. Пладоў хапае як у садах сельгасарганізацый, так і на прысядзібных участках. Як рацыянальна захаваць карысную вітамінную прадукцыю, дзе больш за ўсё любяць беларускія яблыкі? Аляксей Кандраценка ацаніў новы ўраджай.
Сёлетні ўраджай яблыкаў не проста добры, а надзвычай багаты. Антонаўка, штрыфель, белы наліў - на любы колер і густ, бяры не хачу. З аднаго толькі дрэва можна сабраць 60 кілаграмаў пладоў.
Жыхарка пасёлка Дзегцяроўка Жанна Шыбалка лёс ураджаю са свайго саду ўжо вырашыла. Усё для сям'і - 300 кілаграмаў яблыкаў хопіць, каб частаваць родных яшчэ доўгі час.
Жанна Шыбалка, жыхарка п. Дзегцяроўка: Нарыхтоўкі робім, выціскаем сок, таму што ў нас дзеці, а таксама закладваем яблыкі ў скрыні на зіму. Яны ляжаць да вясны, мы ўсю зіму ядзім свежыя яблыкі.
Ураджай у гэтых садах - сотні тон, прычым кожны год. У агракамбінаце Ждановічы яшчэ сем гадоў таму зрабілі выбар на карысць беларускіх гатункаў. Алеся, Імант, Беларускае салодкае. Попыт на тавар заўсёды высокі. Прычым як у нашай краіне, так і ў Расіі. Беларускі яблык цэняць за яго выключную натуральнасць.
Аляксандр Болдзісаў, начальнік цэха садоўніцтва УП Агракамбінат Ждановічы: Вы ведаеце, чаму ў нас на рынку шмат вялізных яблык з Галандыі і Італіі? Таму што яблык у Еўрасаюзе звыш 10 сантыметраў лічыцца нестандартным. І каштуе ён літаральна капейкі. Магу сказаць дакладна - наш яблык экалагічна больш чысты і ў нашым яблыку ўтрыманне вітамінаў большае.
Сабраць ураджай - палова справы, захаваць - цэлая навука. Мікраклімат у сховішчах агракамбіната забяспечвае аптымальную зімоўку яблыкаў, груш, бульбы і капусты. На прылаўкі магазінаў усе яны трапяць і праз паўгода ў свежым выглядзе.
Віктар Дзялец, начальнік базы захоўвання агародніны УП Агракамбінат Ждановічы: Мы зрабілі мадэрнізацыю ўсіх 3 сховішчаў агародніны. А гэта аб'ём да 11 тысяч тон. Мы ўстанавілі магутнае сучаснае халадзільнае абсталяванне. Падтрымліваецца тэмпературны рэжым у камерах.
За апошнія гады фруктовыя сады даюць добрую аддачу. Таму плошчы для іх толькі пашыраюць.
Таццяна Гумянюк, намеснік начальніка аддзела Міністэрства сельскай гаспадаркі і харчавання Беларусі: Штогод валавы збор яблык на ўнутраны рынак таксама павялічваецца. Расце і аб'ём закладкі ў стабілізацыйныя фонды. Гэта гарантуе бесперабойнае паступленне ў гандлёвую сетку. У далейшым, каб не блытаць дэсертную вытворчасць, якая накіравана на пастаўку свежых фруктаў, мы развіваем паралельна сыравінныя зоны перапрацоўчых прадпрыемстваў.
Лішкі яблыкаў са сваіх падворкаў заўсёды можна рэалізаваць. Нарыхтоўчыя пункты ў вобласці пачнуць працаваць ужо ў найбліжэйшы час.
