Адна выстава - 14 майстроў і перапляценне самабытных рамёстваў са скарбонкі народнай творчасці. Культурную спадчыну сваёй малой радзімы прэзентуюць майстры з Салігорска. У сталіцу народныя ўмельцы прывезлі аўтарскі скарб - маляваныя дываны, гліняныя і вырабы з саломкі, таксама тканыя паясы і шкляныя карціны. Акрамя дарослых носьбітаў мастацкай культуры, экспазіцыю дапоўнілі вырабы выхаванцаў студый дэкаратыўна-прыкладнога мастацтва.
Цэнтральнае месца ў арт-прасторы займае экспазіцыя вучняў і кіраўніка заслужанага аматарскага калектыву Беларусі "Скарбонка". Сёлета іх юбілейны сезон. 40 гадоў яны захоўваюць і развіваюць традыцыі керамічнага мастацтва.
Убачыць скарбы народных умельцаў з Салігорска можна да канца красавіка ў мастацкай зале пры Мінскім абласным цэнтры народнай творчасці.