Дар'я Бігун разам з французскай дабрачыннай арганізацыяй уручала ключы ад доўгачаканага падарунка.
Шлях даўжынёй тры тысячы кіламетраў. Спецыяльна абсталяваны аўтобус для дзяцей-інвалідаў даехаў да Івянецкага дома-інтэрната. Дзеці чакалі гасцей з-за мяжы больш чым месяц. І не проста чакалі, а рыхтаваліся да прыезду французаў.
Мішэль Фламбар-Грыф, арганізатар дабрачыннай акцыі (Францыя): Нам вельмі прыемна, што дзеці падрыхтавалі для нас канцэрт. Дзіўна, наколькі яны таленавітыя. Дзякуючы гэтаму аўтобусу, які мы дорым з вялізнай любоўю, яны змогуць без праблем ездзіць на ўсе неабходныя працэдуры і проста вандраваць.
Практычна ўсе выхаванцы дома-інтэрната маюць захворванні апорна-рухальнага апарату. Тут выхоўваюць дзяцей да 18 гадоў, большасць з іх круглыя сіроты. Для іх рэабілітацыі створаныя ўсе ўмовы: фітнес, басейн, масажныя кабінеты і спецыяльныя трэнажоры.
Жан-П'ер Фламбар-Грыф, арганізатар дабрачыннай акцыі (Францыя): Я працую доктарам у Францыі з дзецьмі-інвалідамі. І я быў прыемна здзіўлены, што тут, у доме-інтэрнаце, практычна такія ж умовы, якія ствараюцца для дзяцей з абмежаванымі магчымасцямі ў Францыі. І самае галоўнае - я ўбачыў цяпло і любоў, якія ўкладваюць выхавальнікі ў гэтых дзяцей.
Алена Петрашкевіч, дырэктар Івянецкага дома-інтэрната: Нашы выхаванцы танцуюць на інвалідных калясках, наша выпускніца з'яўляецца чэмпіёнкай свету па танцах на інвалідных калясках, яна другі год з'яўляецца стыпендыяткай прэзідэнцкага фонду, вучыцца ў педагагічным універсітэце. Усё гэта дае магчымасць ставіць перад сабой мэты і дабівацца іх, нягледзячы на ўсе захворванні, якія ў іх ёсць.
Увесь вольны час дзеці надаюць творчасці: робяць вырабы з бісера, паперы і выразаюць па дрэве. А калі дазваляе здароўе, то пасля заканчэння школы яны паступаюць у каледжы.
Сёлета Івянецкаму дому-інтэрнату споўнілася 50 гадоў. У ім жыве 78 дзяцей і ёсць усё неабходнае для іх нармальнага развіцця. Сёння ў дзетак з'явіўся і аўтобус, на якім яны змогуць вандраваць.
Першымі пасажырамі гэтага аўтобуса сталі не дзеці, а цацкі, якія для выхаванцаў збіралі французскія школьнікі. А ўжо гэтым летам хлопчыкі і дзяўчынкі з абмежаванымі магчымасцямі на спецыяльна абсталяваным аўтобусе плануюць адправіцца ў сваё першае падарожжа.
