У Нацыянальным акадэмічным драматычным тэатры імя Горкага гэтым вечарам публіцы пакажуць камедыю пад назвай "Як стаць багатым?". У аснове - п'еса вядомага камедыёграфа Клода Манье.
Як французскі гумар адаптавалі для беларускай аўдыторыі, даведалася Іна Пілевіч. Рэпетыцыя не для артыстаў, а для работнікаў сцэны. За некалькі хвілін да генеральнага прагону майстар-клас па вынасе дэкарацый. Мастацкі кіраўнік Горкаўскага тэатра Сяргей Кавальчык вучыць абыходзіцца з прадметамі не толькі артыстычна, але самае галоўнае - хутка, каб спектакль не страціў дынамікі.
Ставяць п'есу любімага камедыёграфа Луі дэ Фюнеса. Упершыню ў рэпертуары твор Клода Манье "Блэз". Ён лёг у аснову новага спектакля "Як стаць багатым?". Гэта класічная камедыя становішчаў, калі героі трапляюць у кур'ёзныя сітуацыі. Праўда, дзейства вырашана перанесці ў сучасны кантэкст.
У цэнтры ўвагі - малады, таленавіты, але нікому не вядомы парыжскі мастак. Для шчасця юнаку не хапае грошай. Таму ў надзеі разбагацець мастак увязваецца ў авантуру.
Спецыяльна для прэм'еры на сцэне тэатра Горкага ўзнавілі атмасферу французскага дома. Ён уяўляе сабой самы сапраўдны лабірынт. Гэтыя дзверы вядуць у спальню, сталовую, бібліятэку. Але вельмі часта па забыўчывасці галоўны герой запрашае сваіх гасцей у шафу.
Па задумцы пастаноўшчыкаў, галоўны герой піша ў манеры эмпрэсіянізму. Падчас спектакля за свае выдае творы яркага прадстаўніка гэтага напрамку Эгона Шыле. Менавіта рэпрадукцыі яго работ упрыгожваюць імправізаваную майстэрню на сцэне. Ці прынясуць гэтыя палотны багацце галоўнаму персанажу, глядач даведаецца толькі пад заслону.
