Беларусь гатова актыўней развіваць адносіны з Вялікабрытаніяй. Такі важны акцэнт Прэзідэнт зрабіў на сустрэчы з паслом гэтай краіны.
Тры з паловай гады Фіёна Гіб прадстаўляла ў Беларусі інтарэсы афіцыйнага Лондана. Але яе дыпламатычная місія завяршаецца. Гэта прычына для таго, каб акінуць поглядам міждзяржаўныя адносіны. У апошнія гады - гэта супала і з працай спадарыні Гіб у Мінску - кантакты з Лонданам ажывіліся. Актывізаваліся адносіны ў палітычнай сферы. Пачаліся візіты афіцыйных асоб - ад прадстаўнікоў каралеўскай сям'і да дзяржміністра па гандлёвай палітыцы, які быў у нас у чэрвені. З візітамі ў Брытаніі пабывалі кіраўнікі нашага МЗС і ўрада.
Беларуска-брытанскі гандаль паказвае нядрэнную дынаміку. Апошнія некалькі гадоў Вялікабрытанія ў тройцы краін, куды мы больш за ўсё пастаўляем нашу прадукцыю. Павялічваецца і прыток інвестыцый з гэтай краіны. Інтарэс Лондана да Мінска расце. Ёсць жаданне дыверсіфікаваць эканамічныя сувязі. Ацанілі брытанцы і ролю Беларусі па наладжванні дыялогу ў рэгіёне, ды і на фоне Брэксіту перад туманным Альбіёнам стаяць новыя знешнепалітычныя задачы.
Як раз зараз у Брытаніі сфарміравана новы ўрад на чале з прэм'ерам Джонсанам. Прэзідэнт Беларусі заклікаў не марнаваць часу і вызначацца з новымі кірункамі супрацоўніцтва для Мінска і Лондана. У сваю чаргу Фіёна Гіб заклікае ўлічваць важную геапалітычную ролю Беларусі в кантынентальнай Еўропе.
Фіёна Гіб плануе прадоўжыць сваю кар'еру ў Лондане ў МЗС Вялікабрытаніі. Яна падкрэсліла, што супрацоўніцтва з Беларуссю развіваецца пазітыўна, ёсць і вялікі патэнцыял на будучыню. На памяць аб працы ў нашай краіне яна павязе кнігі, лён і карціны. І, вядома, эксклюзіўны шакалад - падарунак ад Кіраўніка дзяржавы.