Умовы для беларускіх свабодных эканамічных зон на рынку Еўразійскага эканамічнага саюза трэба зрабіць як мінімум раўнацэннымі. Гэта Прэзідэнт Аляксандр Лукашэнка заявіў сёння на нарадзе па пытаннях развіцця СЭЗ.
З 1 студзеня ўмовы працы рэзідэнтаў свабодных эканамічных зон істотна мяняюцца. Прынятыя ў рамках ЕАЭС дакументы адмяняюць некаторыя мытныя льготы. У гэтай сувязі ўрад падрыхтаваў праект указа, дзе адлюстраваныя прапановы па павышэнні інвестпрывабнасці СЭЗ і стымуляванні актыўнасці рэзідэнтаў. Сярод іх - вызваленне ад арэнднай платы за зямельныя ўчасткі да канца 2019 года, зніжэнне парогу аб'ёму інвестыцый пры рэгістрацыі ў СЭЗ з аднаго да паўмільёна еўра і пашырэнне межаў СЭЗ "Брэст", "Віцебск" і "Гроднаінвест". Цяперашнюю аддачу ад працы СЭЗ у Беларусі Кіраўнік дзяржавы назваў недастатковай.
Сёння ў Беларусі дзейнічаюць шэсць свабодных эканамічных зон. Рэзідэнты - амаль паўтысячы арганізацый, у якіх працуюць 124 тысячы чалавек. Гэта 4,3 працэнта ад колькасці занятых у эканоміцы краіны. Тэмп росту выпуску прамысловай прадукцыі ў СЭЗ значна перавышае сярэднерэспубліканскі ўзровень. За 9 месяцаў года аб'ём вытворчасці склаў больш чым сем з паловай мільярдаў рублёў, у параўнанні з аналагічным перыядам мінулага года павялічыўся на 24 працэнты.
Вынікі нарады ў Палацы Незалежнасці ў наступных выпусках.
