Узмацняецца кантроль над яхтамі, цеплаходамі і рыбакамі на лодках на вадаёмах Мінскай вобласці

Па хвалях з бяспекай. У гэтыя дні Дзяржаўная інспекцыя па маламерных суднах узмацняе кантроль над яхтамі, цеплаходамі, катамаранамі і рыбакамі на лодках на вадаёмах Мінскай вобласці. Аматары воднага адпачынку нярэдка забываюць пра выратавальныя камізэлькі, што прыводзіць да трагічных наступстваў. Правяраюць таксама і тэхнічны стан плавальных сродкаў. У штотыднёвы рэйд выехаў і наш карэспандэнт Ілья Цвяткоў.

Сёння супрацоўнікі Дзяржінспекцыі па маламерных суднах на вадзе з самай раніцы  рыхтуюцца да рэйду на Мінскім моры. Галоўная задача - выявіць парушальнікаў правіл воднага руху. Паводле слоў спецыялістаў, аматары ранішняй рыбалкі часта забываюць захапіць з сабой выратавальныя камізэлькі, а без іх кіраваць нават самай маленькай лодкай строга забаронена.

Вось так выглядае выратавальная камізэлька, наяўнасць якой правяраюць у першую чаргу. Яна павінна быць, зразумела, цэлай, важыць не больш за адзін кілаграм і мець вось такі  яркі колер – для таго каб пацярпелага было лягчэй знайсці на вадзе.

Камізэлькі новага ўзору - з моцнай тканіны і запоўненыя пласцінамі са спрэсаванага поліўрэтану. Гэты матэрыял дазваляе трымацца на вадзе некалькі гадзін.

У летні сезон такія рэйды праводзяць кожны тыдзень. Узмоцнены кантроль акваторый з пятніцы па нядзелю. Менавіта ў гэтыя дні на ваду выходзяць судны без абавязковага абсталявання і спецыяльнай экіпіроўкі для пасажыраў. Буйныя плавальныя сродкі павінны мець тэхпашпарт, а на борце - аптэчку і набор інструментаў для аварыйнага рамонту. Часта на хвалях ловяць і бяспраўнікаў.

Пад пільнай увагай экскурсійныя судны для забаўных прагулак - яхты і катамараны з вялікай колькасцю адпачывальнікаў. Як правіла, пасажыры на борце рэдка задумваюцца пра бяспеку.

Усяго ў Мінскай вобласці зарэгістравана амаль 54 000 маламерных суднаў, якія час ад часу спускаюць на ваду. Нават самы нязначны дэфект гэтых плавальных сродкаў можа прывесці да трагічных наступстваў. З 2000 года на вадаёмах Мінскай вобласці з прычыны няспраўнасці воднага транспарту і адсутнасці камізэлек загінулі 35 чалавек. Таму самымі простымі правіламі воднай бяспекі грэбаваць не варта.