Сёння ў Музеі гісторыі Вялікай Айчыннай вайны прайшоў фінал маладых чытальнікаў з Полацка і Наваполацка. Творы гучалі на роднай мове на тэму вайны. Выступленням папярэднічала экскурсія па музеі.
Вайна вачамі праўнукаў тых, хто ваяваў за Радзіму, у рэпартажы Ніны Мажэйкі. Беларускі след у Вялікай Айчыннай на трох тысячах квадратных метраў. 10 экспазіцыйных залаў і некалькі тысяч экспанатаў. У новым маштабным будынку музея пабывалі і землякі беларускага першадрукара Францыска Скарыны - вучні 6-11 класаў з Полацка і Наваполацка. Экскурсіяй па выставачных залах аднаго з найбуйнейшых музеяў Беларусі маладыя таленты ўзнагароджаны як фіналісты конкурсу чытальнікаў. Творы беларускіх аўтараў на беларускай мове чытаюць на памяць, пакуль ідзе экскурсія.
6 глаў і чатыры дадаткі: дзяржпраграма "Культура Беларусі" прадугледжвае самыя розныя накірункі. Заканадаўча замацаваны білінгвізм таксама ўлічваецца. На мове не толькі продкаў, але і значнай колькасці сучаснікаў ідуць ключавыя спектаклі нацыянальных тэатраў. Да гэтай лічбы яшчэ і норма на 40% - менавіта такая доля музейных экскурсій праводзіцца па-беларуску.
Са 130 прэтэндэнтаў у фінал прайшлі толькі 30. Дарэчы, такі конкурс праводзіцца ўжо шосты раз. Курыруе творчыя спаборніцтвы Рэспубліканскае грамадскае аб’яднанне "Белая Русь". Маладыя дэкламатары амаль землякі - паміж двума гарадамі ўсяго 13 кіламетраў. Дарэчы, ініцыятар - знакаміты беларускі кідальнік молата, а зараз дэпутат Вадзім Дзевятоўскі. Таксама з Наваполацка.
Чытанні прайшлі ў даволі мабільным для гэтага жанру фармаце. Куляшоў, Караткевіч, Панчанка, Вярцінскі - гэта толькі некалькі імёнаў класікаў, якія пісалі і апісвалі вайну. Іх творы, а таксама асабістыя вершы дэкламавалі яшчэ не зусім упэўненыя аратары. Журы яшчэ падчас выступленняў ставіла ацэнкі, а сакратар збірала бланкі для падліку вынікаў.
Навум Гальпяровіч, паэт, публіцыст, галоўны дырэктар дырэкцыі замежнага вяшчання Беларускага радыё: "Гэта ў першую чаргу эмацыянальнае гучанне, гэта валоданне мовай, гэта тое, як данясуць змест вершаў нашых паэтаў юныя чытальнікі. Але гэта, бадай, не самае галоўнае – самае галоўнае, што будуць гучаць вершы пра нашу Радзіму, будуць гучаць вершы, прысвечаныя вызваліцелям, будуць гучаць вершы, прысвечаныя 70-годдзю Вялікай Перамогі".
Выканаўцы беларускіх твораў атрымалі падзякі з рук суддзяў, а таксама кнігі беларускіх аўтараў. Далей паводле раскладу – экскурсія па спартыўных аб’ектах Мінска.
