Голас сучаснай Францыі ў рамках сусветнага турнэ прапануе абранае з рэпертуару легенды эстрады - а гэта 24 кампазіцыі ў цалкам нечаканых аранжыроўках. Пад Піяф на сцэне нават танцуюць хіп-хоп і брэйк-данс.
І хоць шоу усё яшчэ працягваецца, Іна Пілевіч паспела прывезці эксклюзіўныя кадры да эфіру.
Для сустрэчы з мадмуазэль Блюз яна падрыхтавала поўны набор цырульных прылад - ад шпілек да нажніц. Мінскі стыліст Вольга рыхтавалася да самых экстравагантных просьбаў Патрысіі Каас. Але прыма французскай эстрады папрасіла стварыць натуральны вобраз. Гэтыя 20 хвілін беларускі майстар запомніла па секундах.
Даць цырульніка высокага класа - гэта нават не капрыз з зорнага райдара, а звычайнае жаночае жаданне… Патрысія Каас не возіць за сабою світу кухараў і візажыстаў… Хоць, вядома ж, арганізатары канцэрту ў Мінску, улічваючы статус, размясцілі выканаўцу з камандай у гатэлі 5 зорак.
Спявачка прыбыла ў Мінск напярэдадні. Апярэджваючы спявачку, з трапа самалёта сышоў яе сабачка Тэкіла. Мальтыйская балонка пастаянна суправаджае гаспадыню на гастролях. У Мінску трэці раз. А быў яшчэ Славянскі базар!
Больш чым канцэрт - паўнавартасны спектакль, прысвечаны памяці Эдзіт Піяф. Сёлета роўна паўстагоддзя таму не стала іконы французскай эстрады, вядомай яшчэ як верабейчык Парыжа. Менавіта з яе рэпертуару 19-гадовая Каас пачала сваю кар'еру. Строгая тканіна - як галоўная дэкарацыя. Да шоу Каас сцэну апранулі ў чорны колер. Атмасферу парыжскіх вуліц 30-50-х гадоў Патрысія ўзновіць толькі сваім галоўным інструментам - моцным голасам. 24 песні Піяф за дзве гадзіны. Як знаёмыя, так і малавядомыя, яны атрымалі сучаснае гучанне. Новыя аранжыроўкі Каас запісвала з лонданскім каралеўскім філарманічным аркестрам. Але на сцэне камерны склад - 3 інструменталісты і танцоўшчык.
Галёрка за тры сотні тысяч рублёў. Партэр два мільёны. Пустых крэслаў у зале няма. Турнэ далікатнай францужанкі з моцным голасам распісана да канца года і ахоплівае найбуйнейшыя сталіцы. Ужо ў сераду Каас праспявае Піяф у Фінляндыі.
