На "Беларусьфільме" завяршыўся мантаж сцэны нацыянальнага адбору на "Еўрабачанне-2020"

У самым вялікім павільёне кінастудыі "Беларусьфільм" завяршыўся мантаж сцэны нацыянальнага адбору на "Еўрабачанне-2020". Тэхнічнай камандзе спатрэбіліся 3 дні, каб усталяваць усе неабходныя канструкцыі, а таксама падключыць іх да інтэлектуальнай сістэмы кіравання.

Маштабы шоу сёлета павялічыліся амаль удвая. Карысная плошча павільёна 1000 кв.м. Сцэны будзе дзве - вялікая і малая. Іх злучылі паміж сабою з дапамогай святлодыёдных мастоў. У разы больш стала і святла - чатыры сотні прыбораў. Дарэчы, у кожнага з фіналістаў будзе свой індывідуальны сцэнарый асвятлення і відэакантэнта.

Галіна Гоманава, мастак-пастаноўшчык Белтэлерадыёкампаніі: "Гэта была канструктыўная ідэя, кардынальная - змяніць пляцоўку. Таму што мы сёння знаходзімся ў самым вялікім павільёне краіны - гэта студыя 1000 кв.м. "Беларусьфільма". Гэта самы вялікі абсталяваны павільён для такіх здымак на сённяшні дзень. Гістарычна так склалася, што ўвесь час "Еўрабачанне" выходзіла ў эфір са студыі "600 метраў" на Макаёнка, але гэтая студыя, па-першае, меншая, па-другое, яна зроблена ўніверсальна для ўсіх праектаў, таму там шмат стацыянарна зманціраванага абсталявання -  светлавога і экраннага. Гэтая студыя выдатная, але тут магчымасцей значна больш". 

У гэтыя хвіліны фіналісты знаёмяцца са сцэнай. Ужо пачаліся тэхнічныя кансультацыі з камандай Белтэлерадыёкампаніі. Пад кожнага з тузіна артыстаў распрацаваны арыгінальны відэакантэнт, г.з. афармленне нумара з дапамогай LED-экранаў, а таксама сцэнарый асвятлення. На гэта сёння робяць асаблівы акцэнт. Прагоны з музычным суправаджэннем і наладжванне гуку пачнуцца заўтра на першай рэпетыцыі.

NAPOLI, фіналістка нацыянальнага адбору на "Еўрабачанне-2020": "Шыкоўная сцэна, ёсць дзе разгуляцца. Можна памяняць пазіцыю, пачаць у адным месцы, перайсці ў другое. Сёлета прастора вялізная і шырыня нашых дзеянняў не абмежаваная. У нас загадзя былі эскізы сцэны. Мы вырашылі задзейнічаць усю пляцоўку, г.з. мы пачнём з маленькай сцэны і пяройдзем на галоўную, на вялікую сцэну".

Фінал нацыянальнага адбору адбудзецца 28 лютага ў 22:00. Прамую трансляцыю шоу будуць весці тэлеканалы "Беларусь 1" і "Беларусь 24".