На працягу тыдня прыхільнікі танца змогуць ацаніць як класічныя спектаклі, так і сучасныя эксперыментальныя пастаноўкі. Білеты на амаль усе вечары рэалізаваныя, і гэта нягледзячы на фінал тэатральнага сезона. Па, батманы і атыцюды ў выкананні зорак сусветнага балета - у рэпартажы Іны Пілевіч.
Белы і Чорны лебедзь з Крамлёўскага балета. Прыма-балярына маскоўскага тэатра Аляксандра Цімафеева асвоіла галоўныя партыі спектакля "Лебядзінае возера" ў максімальна кароткія тэрміны: адна рэпетыцыя напярэдадні і генеральны прагон у дзень выступлення. Заслужанай артыстцы Расіі гэтага досыць, каб станцавацца з трупай Вялікага тэатра Беларусі.
Запрошаная Адэта-Адылія танцуе ў дуэце з не меней тытулаваным беларусам. Партыя прынца Зігфрыда - у вядучага майстра сцэны, народнага артыста Ігара Артамонава. Білеты на класіку ў іх выкананні разышліся вельмі хутка. Зала цалкам запоўненая. І гэта нягледзячы на фінал тэатральнага сезона і паніжэнне актыўнасці гледачоў.
Балетнае лета ўжо другі раз сабрала ў Мінску зорак сусветнай харэаграфіі. У гэтым сезоне на міжнародным фестывалі гасцююць выключна прымы. Грузінка Лалі Кандэлакі выканае Лаўрэнсію, а расіянка Кацярына Борчанка пераўвасобіцца ў Жызель. Дарэчы, цяпер тытулаваная балярына пачынала кар'еру на нашай сцэне.
Дзевяць спектакляў за сем дзён. Балетнае лета робіць стаўку на класіку. У афішы вядомыя "Шахеразада", "Жар-птушка", "Рамеа і Джульета". Але бліжэй да фіналу міжнароднага фестывалю танцоўшчыкі адмовяцца ад традыцыйных пачак і пуантаў. Для эксперыментаў вылучылі вечар сучаснага балета.
У праграме фестывалю запланаваны і тэматычны вечар у гонар рускага харэографа, рэфарматара балета Міхаіла Фокіна. Фінальным па балетнага лета стане гала-канцэрт. Ён збярэ зорак сусветнай сцэны з Азербайджана, Беларусі, Германіі, Фінляндыі, Швецыі, Эстоніі.
