Вырашылася галоўная вакальная інтрыга восені. Па выніках змяшанага галасавання прадстаўляць Беларусь на дзіцячым "Еўрабачанні-2019" будзе Лізавета Міснікова.
З песняй "Попельны" на рускай мове 14-гадовая мінчанка адправіцца на прэстыжны песенны форум у Польшчу. Першыя эмоцыі пераможцы ў рэпартажы - Дар'і Тарасавай.
Дзявочнік на сцэне нацыянальнага адбору. На гала-канцэрце гучаў выключна жаночы вакал. І гэта ўпершыню за ўсю гісторыю конкурсу. Хоць увогуле на еўравізійную пуцёўку прэтэндавала больш як 800 юных артыстаў за розныя сезоны. Сёлета ў фінале восем сольных выканаўцаў, дзве каманды і адна мара на ўсіх. Займець статуэтку і праспяваць на ўсю Еўропу.
Гіганцкі бубен, святлівыя аркі і сажалка прама на сцэне. Так, фіналісты эксперыментавалі з падачай кампазіцый. Кожнае дзеянне вакалістаў падсвятлялі сотні светлавых прыбораў. Для трансляцыі задзейнічалі самую розную тэхніку. Здымалі краны, стэдыкамы і рэйкі.
Сэрца трансляцыі знаходзіцца за межамі здымачнай пляцоўкі і нават па-за Белтэлерадыёкампаніяй. Галоўная ўдзельніца нацыянальнага адбору - Ефрасіння - выканаўца без нумара ў гала-шоу. Сюды, у тэлестанцыю на колах, паступае сігнал з 12 камер, а пасля разлятаецца на экраны, каб шоу ўбачылі не толькі ў "шасцісотцы", але і ў кожным доме.
Настрой на пляцоўцы задаваў дуэт вядучых. Андрэй Макаёнак і Хелена Мерааі, якая ведае ўсё аб кухні песеннага конкурсу, вакалістка вяла дзіцячае "Еўрабачанне", якое летась прымала Беларусь і сама ў 2017 годзе прадстаўляла нашу краіну на конкурсе.
Пачаткоўцаў на еўравізійнай ніве падтрымалі і тыя, каму знаёма хваляванне перад вялікай сцэнай. У якасці запрошаных зорак - прадстаўнікі Беларусі на дзіцячым "Еўрабачанні" розных гадоў.
10 хвілін на тое, каб выбраць голас дзіцячага "Еўрабачання". Столькі часу ў прамым эфіры адвялі на анлайн-галасаванне. Выбіралі тэлегледачы і журы. Састаў апошніх да пачатку гала-канцэрта трымаўся ў сакрэце. Імя пераможцы даведаліся не ў дзіцячы час. Лізавета Міснікова атрымала больш за паўтары тысячы галасоў ад тэлегледачоў і 10 балаў ад журы. Выйшла на сцэну першай і забрала сэрца нацыянальнага адбору. З песняй "Попельны" Ліза адкрывала гала-канцэрт. У творчым рэзюмэ вакалісткі пяць гадоў музычнай школы і заняткі харэаграфіяй.
Для міжнароднага эфіру нумар мадэрнізуецца. Магчыма, "Попельны" Лізаветы Міснікавай загучыць у акустычнай версіі. А ўжо 24 лістапада Ліза праспяе на сцэне "Глівіцэ-Арэны". Сёлета дзіцячае "Еўрабачанне" ўпершыню прымае Польшча.
