Беларусь сёння даведаецца імёны фіналістаў нацыянальнага адбору на "Еўрабачанне-2019". У гэтыя хвіліны ў Белтэлерадыёкампаніі праходзіць праслухоўванне прэтэндэнтаў. Сачыць за ўсім, што адбываецца, можна анлайн на сайце медыяхолдынга tvr.by. Сёлета на адрас праекта паступіла рэкордная колькасць заявак - 113. Свае кампазіцыі даслалі музыканты з 16 краін, у тым ліку ЗША, Казахстана, Вялікабрытаніі, Нігерыі. У спісе прэтэндэнтаў ёсць і навічкі, і ўдзельнікі адбораў на дарослае і дзіцячае "Еўрабачанне" мінулых гадоў: ЗЕНА, Анжаліка Пушнова, групы Aura, "PROвокация" і Napoli. Ацэньвае кампазіцыі журы. Фіналісты нацадбору выканаюць свае песні ў прамым эфіры тэлеканалаў "Беларусь 1" і "Беларусь 24". Пераможца адправіцца ў маі на "Еўрабачанне" ў Тэль-Авіў.
