Тэлеканал "Беларусь 3" рыхтуе прэм'еру. 10 творчых партрэтаў мастакоў - 10 фільмаў новага тэлевізійнага цыкла "Сучаснае мастацтва Беларусі". Аўтары і стваральнікі тэленавел - Алег Лукашэвіч і Аляксандр Аляксееў, вядомыя па арт-праекце "Спадчына Беларусі", а таксама дакументальным цыкле аб мастаках Парыжскай школы, народжаных у нашай краіне. Гэтым разам новы ракурс знайшлі для нашых сучаснікаў - майстроў, якія сёння фарміруюць айчынны фонд жывапісу. Некаторыя з герояў - лаўрэаты спецпрэміі Прэзідэнта. Экранізацыяй творчы тандэм заняўся год таму. За гэты час ідэя прайшла поўны цыкл - ад здымак да мантажу. Акрамя таго, кожная серыя мае індывідуальнае графічнае афармленне.
Алег Лукашэвіч, аўтар сцэнарыя і рэжысёр праекта "Сучаснае мастацтва Беларусі":
"Аснова фільма - гэта вялікае інтэрв'ю з героем, гэта яго думкі. У фільме няма закадравага тэксту. І плюс самае асноўнае - правільна паказаць працы мастака. Таму што, на жаль, не заўсёды правільна іх паказваюць. А што такое правільна - гэта не фрагментарна паказаць працу, гэта так, каб глядач паўнавартасна змог убачыць гэтую працу".
Аляксандр Аляксееў, аўтар графічнага афармлення праекта "Сучаснае мастацтва Беларусі", другі рэжысёр:
"Мы ў гэтым фільме жадалі не парушыць асабістую прастору кожнага мастака. У фільме спецыяльна так зроблена ўсё графічнае афармленне або колеракарэкцыя, якая б проста падкрэслівала, найболей натуральна перадала жывапіс кожнага мастака".
Такім чынам, прэм'ера тэлевізійнага цыкла адбудзецца на тэлеканале "Беларусь 3" 24 студзеня. Першая серыя праекта прысвечаная мастаку Валерыю Шкарубу.
