Адно з галоўных хрысціянскіх святаў адзначылі мільёны каталікоў і пратэстантаў Заходняй Еўропы, Амерыкі, Аўстраліі, а таксама шматлікіх краін Афрыкі і Азіі. Упершыню з 1977 Раство прыпала на поўню. Хтосьці заве гэта падарункам нябёсаў, а хтосьці проста добрым знакам. Калядную імшу ў саборы Святога Пятра сёння ўначы адслужыў Папа Рымскі Францыск.
Увечар 24 снежня ва ўсіх рымска-каталіцкіх храмах свету прайшлі святочныя начныя набажэнствы. Галоўную калядную службу Еўропы - імшу ў саборы Святога Пятра ў Ватыкане - правёў Папа Рымскі Францыск. Паслухаць пантыфіка сабраліся дзясяткі тысяч вернікаў.
Папа Рымскі Францыск: "У грамадстве, якое гэтак часта задыхаецца ад спажывецтва і геданізму, багацця і нястрыманасці, фармалізму і нарцысізму, немаўля Ісус заклікае нас паступаць разважліва, іншымі словамі, проста, гарманічна і паслядоўна. Мы павінны бачыць і рабіць тое, што насамрэч важна. У свеце, які занадта часта аказваецца бязлітасны да грэшніка і паблажлівы да граху, мы павінны культываваць моцнае пачуццё справядлівасці, каб адрозніць волю Божую і кіравацца ёй".
Папа Рымскі Францыск яшчэ некалькі дзён таму даў зразумець вернікам, што сёлета звыклай глыбокай пашаны перад Раством яму не наканавана адчуць праз стан вайны, у якім знаходзіцца ўвесь свет. Пантыфік заклікаў чалавецтва вярнуцца да простых каштоўнасцяў, не забываючы пра спачуванне, справядлівасць і суперажыванне.
Папа Рымскі Францыск: "Тут няма месца для сумненняў, давайце пакінем гэта скептыкам, якія прывыклі шукаць прычыны. Ім не знайсці ісціны. Тут няма месца для абыякавасці, якая пануе ў сэрцах тых, хто не здольны любіць ад страху стратаў. Свет пазбавіўся ад смуткаў, калі Немаўля Ісус прынёс суцяшэнне ў сэрца кожнага з нас".
Калядную ёлку запалілі на галоўнай плошчы Ватыкана 18 снежня. Вышыня дрэва сёлета склала амаль 23 метры. Елку даставілі з Германіі, а ўпрыгожылі яе цяжкахворыя дзеці. Побач з ёлкай была загадзя ўсталяваная калядная батлеечная кампазіцыя. Яе прывезлі з італьянскага горада Трэнта. Кампазіцыя складаецца з 24 драўляных фігур.
Сёлета падчас каляднай пропаведзі ў Ватыкане былі ўзмоцненыя меры бяспекі. Кожны, хто прысутнічаў на імшы, праходзіў праз металадэтэктар. У калядную раніцу Папа Рымскі звернецца з традыцыйнай прамовай Urbi et Orbi ("Да горада і свету") з цэнтральнага балкона плошчы Святога Пятра ў Ватыкане.
