Асоба злачынца ўстаноўлена - гэта 21-гадовы Дзілан Квік. Заняткі ў навучальнай установе пакуль прыпыненыя. Адміністрацыя каледжа зараз спрабуе ўзмацніць меры бяспекі. Але ўсёй краіне гэта не дапаможа, амерыканскія ўлады пакуль не прымаюць да ўвагі вопыт дзясяткаў адзінкавых выпадкаў насілля. Чаму?..
Юлія Табалевіч - высвятляла.
Студэнты каледжа Лоўн-Стар непадалёк ад Х'юстана дагэтуль не могуць ачуцца. У самы разгар навучальнага дня ўзброены малады чалавек без бачнай прычыны пачаў нападаць на ўсіх, хто трапляўся яму на шляху.
Майкл Чэлфан, відавочца: Першае, што я ўбачыў - гэта падазронага. Ён ішоў проста на мяне. Але як толькі ён наблізіўся, паліцэйскія ўжылі электрашокер, павалілі на зямлю і скруцілі.
Усяго за некалькі хвілін злачынец паспеў раніць 15 чалавек. Відавочцы разні апісваюць тое, што адбывалася, як сцэну поўнага хаосу. Кроў была паўсюль. Студэнты і выкладчыкі разбягаліся, некаторыя спрабавалі лавіць нападаючага і дапамагаць параненым.
Пазней высветлілася, што нападаючы - студэнт гэтага ж каледжа. Як распавядаюць аднакурснікі, ён быў эксцэнтрычным юнаком - часта надзяваў пальчаткі і насіў з сабою мяккія дзіцячыя цацкі.
Адрыян Гарсія, шэрыф паліцыі: Мы паглядзелі запісы камер назірання і можам сцвярджаць, што быў толькі адзін нападаючы, якога ўжо затрымалі. Гэта студэнт каледжа, яму 21 год. Зараз мы вывучаем усе паказанні сведак.
Выпадкі нападзенняў у амерыканскіх навучальных установах становяцца ў апошні час сумнай тэндэнцыяй. У студзені ў гэтым жа каледжы некалькі чалавек атрымалі раненні ў перастрэлцы. Дарэчы, увесь гэты тыдзень у Кангрэсе ЗША працягваюцца гарачыя дэбаты цалкам або часткова забараняць продаж. На чарговае пасяджэнне заканадаўцаў прыехалі сваякі загінуўшых падчас страляніны ў школе Ньютаўна. Яны патрабуюць зрабіць хоць штосьці, каб спыніць узброенае насілле. Ахвярамі той трагедыі сталі 26 чалавек.
Рычард Блюменталь, сенатар ад штата Канектыкут: Гэтыя людзі прыехалі сюды, каб заклікаць палітыкаў да дзеяння. Большасць амерыканцаў жадаюць спыніць насілле, і жыхары Ньютаўна, якія перажылі жудасную трагедыю, могуць прадстаўляць іх інтарэсы.
Страты Амерыкі ад зброі самаабароны нагадваюць зводкі грамадзянскай вайны - у год ад куль гінуць больш за трыццаць тысяч чалавек. У першую чаргу трэба зрабіць так, каб любая зброя - будзь то нож або вінтоўка - ніколі не трапляла ў рукі псіхічна неўраўнаважаных людзей.
