Галоўны вынік Алімпіяды ў Пхёнчхане для Беларусі - у нашай зборнай тры ўзнагароды, дзве з іх вышэйшай пробы. Прычым вызначыліся толькі нашы дзяўчаты: Ганна Гуськова выйграла золата ў спаборніцтве лыжных акрабатаў, а жаночая чацвёрка ў складзе Надзеі Скардзіны, Ірыны Крыўко, Дзінары Алімбекавай і Дар'і Домрачавай сталі алімпійскімі чэмпіёнкамі ў эстафеце. Дададзім сюды серабро Домрачавай у мас-старце і атрымаем 15-е выніковае месца Беларусі ў агульным заліку.
Але гэта ўсё сухія лічбы, а для шматлікіх беларускіх балельшчыкаў гэтыя Гульні ў напале пачуццяў сталі аднымі з самых эмацыянальных. Што ні спаборніцтва, то нервы! Успомніце, як радавалася ўся краіна, калі ў нас было першае золата ад Ганны Гуськовай у фрыстайле. Або вось наш калега Станіслаў Ліпскі: перад вырашальным скачком Ганны нават устаў на калені - так шчыра хварэў за нашу спартсменку.
На вагу золата было і серабро Дар'і Домрачавай. А ўжо цуд, які асабістай мужнасцю стварыў наш біятлонны квартэт у эстафеце, словамі не перадаць.
Дзяўчынкі паказалі сталёвы характар і волю да перамогі. І па годнасці ўзнагароджаныя ордэнам "За асабістую мужнасць". У жорсткай канкурэнцыі, у складаных умовах надвор’я дзяўчыны зладзіліся выдатна. Ззаду сусветныя лідары - Германія, Францыя, Нарвегія, Італія і Украіна.
Наогул паўднёвакарэйскія Гульні выдаліся цалкам паспяховымі ў суверэннай гісторыі Беларусі. Але ёсць і горыч. Горыч ад таго, што маглі лепш. Антона Кушніра з барацьбы за медалі выштурхалі суддзі. Былі ў Пхёнчхане і допінгавыя скандалы, на шчасце, без нашага ўдзелу. Павел Капуцкі - пра асноўныя вынікі Алімпіяды-2018.
Ад расчаравання і роспачы да трыумфу і абсалютнага шчасця. Лыжнікі не маглі дыхаць ад холаду, фрыстайлісты здзіўляліся ад судзейскіх ацэнак, біятланісткі не спраўляліся з суровым паўднёвакарэйскім ветрам. У першы тыдзень Алімпіяды наравісты Пхёнчхан не шкадаваў беларусаў. 14 лютага, калі жаночую індывідуальную гонку з-за моцнага ветру перанеслі, Ірына Крыўко ўжо нічога не хацела.
Праз восем дзён нараджэнка Сянно, што ў Віцебскай вобласці, стане алімпійскай чэмпіёнкай. Яе месца ў эстафеце было стабільнае, як і пазіцыі Домрачавай і Скардзіны. Паміж Надзеяй Пісаравай і Дзінарай Алімбекавай трэнеры думалі да апошняга. І выбралі маладзейшую спартсменку.
У студзені на этапе ў Аберхофе трэнеры ўключылі Алімбекаву ў эстафетную чацвёрку, і маладая біятланістка падвяла. Тры штрафныя кругі на лежцы не апраўдвае нават моцны туман. Тады Домрачава сышла на дыстанцыю перадапошняй, а пазней нашу каманду знялі за адставанне на круг. Потым лідар гонкі падтрымала Дзінару. Сказала: так загартоўваецца сталь.
Пачаўшы з двух промахаў на лежцы, Алімбекава супакоілася і закрыла мішэні, быццам ёй не 22 гады і Алімпіяда не дэбютная. Да гэтага на другім этапе Ірына Крыўко ідэальна прайшла стойку, хоць з-за ветру прамахваліся многія. Яшчэ раней Надзея Скардзіна, якая ад ператамлення спала некалькі гадзін, скарысталася двума дадатковымі патронамі. Дзяўчыны зрабілі ўсё, каб лідар Дар'я Домрачава магла біцца не проста за медаль - за золата!
У гэты дзень, 22 лютага, Домрачава стала першай у гісторыі жаночага біятлона чатырохразовай алімпійскай чэмпіёнкай. Хоць падчас другой яе стральбы ў беларускіх балельшчыкаў масава гінулі нервовыя клеткі.
Хварэла біятлонам і каманда Белтэлерадыёкампаніі, якая працавала ўсе гэтыя дні на Алімпіядзе. Домрачава закрывае тры мішэні трыма дадатковымі патронамі, а потым уцякае ад шведкі і францужанкі. На фінішы яе сустракаюць алімпійскія чэмпіёнкі: Надзея Скардзіна, Ірына Крыўко і Дзінара Алімбекава.
У Пхёнчхане Домрачава выйграла медаль і ў асабістай гонцы. Серабро мас-старту дапоўніла калекцыю. Бронза Ванкувера, тры залатыя медалі Сочы і вось зараз серабро і яшчэ адно золата.
На адну чэмпіёнку больш у Беларусі стала ў лыжнай акрабатыцы. 25-гадовая Ганна Гуськова выйгравае ў адным з відаў, дзе многае вырашаюць не заўсёды аб'ектыўныя суддзі. Ала Цупер засталася чацвёртай.
А вось Антона Кушніра нахабна не пусцілі ў фінал. Абодва яго скачкі ў кваліфікацыі атрымаліся класнымі, гэта быў прэтэндэнт на золата.
Сяргей Далідовіч праз праблемы са здароўем не дабраўся да фінішу ў адзінай гонцы, але стаў сяміразовым удзельнікам Алімпіяд і зраўняўся з Кацярынай Карстэн. Былі ў Беларусі хоць і не адзначаныя ўзнагародамі, але таксама годныя выступленні. Пятае месца ў біятлонным міксце, восьмае ў мужчынскай эстафеце, 6-я і 7-я пазіцыі канькабежкі Марыны Зуевай і 7-ы радок у калегі па авале Віталя Міхайлава. У канькабежцаў наогул здарыўся прарыў. У Паўднёвай Карэі выступалі пяць беларусаў. У Сочы не было ні аднаго.
На Алімпіядзе спартсмены пераадольваюць сябе, хтосьці б'ецца за золата, камусьці досыць удзелу. Лыжнік з Тонгі Таўфа Тофуа выйшаў на цырымоніі адкрыцця з аголеным торсам, а ў гонцы на 15 кіламетраў заняў 114-е месца. Ён удзельнічаў і ў летняй Алімпіядзе ў Рыа. Турнір таэквандыстаў скончыўся для яго ў першым раўндзе. Чалавек з ціхаакіянскай краіны збіраецца ў Токіа. У якасці плыўца.
Унікальнае дасягненне Эстэр Ледзецка дазволіла Чэхіі абысці Беларусь у медальным заліку. 22-гадовая дзяўчына выйграла золата ў двух розных відах: гарналыжным спорце і сноўбардзе.
Каманда аб'яднаных атлетаў з Расіі толькі ў апошні дзень нагнала Беларусь у медальным заліку. Хакеісты выйгралі фінал у немцаў. Нашы праз пройгрыш славенцам у кваліфікацыі прапускалі другую Алімпіяду запар. Праз чатыры гады Гульні ў Пекіне, праз пяць - хатні чэмпіянат свету.
Нападаючы зборнай Славеніі Жыга Егліч гуляў супраць беларусаў у Мінску і нават вызначыўся галявой перадачай. У Пхёнчхане яго злавілі на допінгу. Гэтак жа, як і ўсходніх суседзяў, - бабслеістку Надзею Сяргееву і кёрлінгіста Аляксандра Крушальніцкага. У апошняга забралі бронзавы медаль.
Звычайна гэта завецца Рускім домам. Але пасля допінгавага скандалу ён стаў Домам спорту. Расіяне арандавалі адзін з паўднёвакарэйскіх ЗАГСаў і на ўваходзе паставілі Шарыка з Прастаквашына.
Яшчэ да Гульняў расійскія хакеісты ў Туле ўдзельнічалі ў вытворчасці пернікаў. Тону прысмакаў адправілі чартарам разам з камандай на Алімпіяду і частавалі імі гасцей Дому спорту.
Алімпіяда аб'ядноўвае! Паўднёвая і Паўночная Карэі сталі бліжэй. У жаночым хакеі ад дзвюх краін выступала адна каманда. І паўночнакарэйскія балельшчыцы сваёй арганізаванасцю ўразілі свет.
У 2021 годзе краіны могуць разам правесці Азіяцкія гульні.
У суме ў Беларусі ў Пхёнчхане тры медалі: два залатыя і сярэбраны. Не лічачы трыумфальных Гульняў у Сочы, гэта наша лепшая зімовая Алімпіяда! Алімпіяда, якую мы будзем успамінаць праз дзясяткі гадоў.
