Зусім хутка купальны сезон - пра гэта нагадваюць супрацоўнікі МНС Мінскай вобласці. Адпачынак ля вады заўсёды звязаны з рызыкай, асабліва, калі не выконваць простыя правілы бяспекі.
Як эфектыўна дапамагчы чалавеку, якому стала дрэнна ў вадзе - пра гэта ратавальнікі расказваюць школьнікам падчас правядзення тэматычных спаборніцтваў. Так, ва Уздзе старшакласнікі з усіх раёнаў вобласці прайшлі водную дыстанцыю, навучыліся правільна выратоўваць людзей з воднага віру.
Падрабязнасці - у Ільі Цвяткова.
Урокі выратавання на вадзе для школьнікаў
Адчуваць сябе як рыба ў вадзе і пры гэтым умець аказаць эфектыўную дапамогу таму, хто трапіў у надзвычайную сітуацыю і не можа самастойна дабрацца да берага. Ва Уздзе на базе новага фізкультурна-аздараўленчага комплексу выбіраюць лепшага плыўца сярод школьнікаў з усіх раёнаў Мінскай вобласці.
Больш за 50 юнакоў з усіх куткоў цэнтральнага рэгіёна - на старце заплыву бяспекі. Кожны займаецца плаваннем ужо на працягу некалькіх гадоў, ведае, як выкарыстоўваць розныя стылі на вадзе, але рэальнае выратаванне пацярпелага - гэта адмысловая тэхніка, якая патрабуе спецыяльнай падрыхтоўкі.
На працягу трох месяцаў маладыя людзі рыхтаваліся да абласнога этапу спаборніцтваў. На дыстанцыі - самае важнае - паказаць хуткасць пераадолення дарожкі і якасць выканання элементаў. Задача - дабрацца да манекена, які знаходзіцца на максімальнай глыбіні басейна, падняць умоўнага пацярпелага і даставіць яго на бераг.
Манекен важыць каля 20 кг. Гэта набліжае працэс выратавання да рэальных умоў. Транспартаванне неабходна выконваць на спіне, а таксама сачыць, каб органы дыхання ўмоўнага пацярпелага заўсёды заставаліся над вадой. Інакш суддзі не залічаць заплыў.
У асабістым заліку лепшыя паказчыкі па часе ў плыўца з Барысаўскага раёна - яго вынік 34 секунды, самай хуткай камандай пасля агульнага падліку балаў стала зборная Стаўбцоўскага раёна.
Зусім хутка пачнецца купальны сезон. МНС нагадвае асноўныя правілы бяспекі. Выхад на вадаёмы магчымы толькі ў спецыяльна абсталяваных месцах. Бацькам жа адпускаць непаўналетніх да вады без суправаджэння забаронена.
