Сёння ў Палацы Незалежнасці прайшоў вялікі перагаворны дзень. Адразу некалькі сустрэч правёў Кіраўнік дзяржавы. Прэзідэнт закрануў самыя актуальныя пытанні і палітыкі, і эканомікі, і спорту. Так, вынікі знешнеэканамічнай дзейнасці, развіццё адносін з Еўразійскім і Еўрапейскім саюзамі і графік міжнародных сустрэч Аляксандр Лукашэнка абмеркаваў з міністрам замежных спраў Уладзімірам Макеем. Прэзідэнт нагадаў, што прыярытэтам нумар адзін застаецца эканоміка, а яе аснова - гэта экспарт. Менавіта з акцэнтам на экспарт павінна развівацца знешнеэканамічная дзейнасць. Як далажыў Уладзімір Макей, у першым паўгоддзі адзначаецца пазітыўная тэндэнцыя: экспарт дадаў амаль 20 працэнтаў.
Уладзімір Макей, Міністр замежных спраў Беларусі: "За першае паўгоддзе 2018 года экспарт вырас на 19,4 %. Пры гэтым назіраецца рост паставак высокатэхналагічных тавараў. Ідзе рост на ўсіх рынках. У залежнасці ад рынку - ад 4 % да амаль 30 %. Гэта дадатныя моманты. Вельмі актыўна развіваецца знешнеэканамічная дзейнасць з Кітаем. У нас тут рост на 37 %. Пайшла сельскагаспадарчая прадукцыя".
Дарэчы, за першае паўгоддзе экспарт малочнай прадукцыі ў Паднябесную павялічыўся ў 5,5 раза. А сёння ўпершыню ў фармаце поўнакантэйнернага цягніка ў Кітай адправіўся састаў з беларускай малочнай прадукцыяй. Дастаўка ў пункт прызначэння зойме 10 дзён - замест амаль паўтара месяца марскім шляхам. У планах - адпраўляць да ста кантэйнераў за месяц.
Разам з тым, як адзначыў Уладзімір Макей па выніках сустрэчы, яшчэ трэба нарошчваць долю высокатэхналагічнай прадукцыі ў беларускім экспарце. Зараз гэты паказчык не перавышае 2,5 працэнта. Не атрымліваецца пакуль дасягнуць і дыверсіфікацыі экспарту па формуле 30-30-30 (у роўных долях на рынкі ЕАЭС, ЕС і краін далёкай дугі).
Сёння абмеркавалі і наступныя міжнародныя сустрэчы Кіраўніка дзяржавы. Як адзначыў міністр замежных спраў, да канца года графік будзе шчыльным. Акрамя замежных візітаў (а найбліжэйшы - у сярэдзіне верасня ва Узбекістан), высокіх гасцей чакаюць і ў Мінску. Беларуская сталіца прыме і шэраг маштабных міжнародных мерапрыемстваў, такіх як канферэнцыя АБСЕ "Прадухіленне і барацьба з тэрарызмам у лічбавую эпоху" і сустрэча асноўнай групы Мюнхенскай канферэнцыі па бяспецы.
