Пад знакам беларуска-кітайскіх перамоў праходзяць гэтыя дні ў Мінску. У Палацы Незалежнасці прайшла сустрэча Прэзідэнта Беларусі са старшынёй Пастаяннага камітэта Усекітайскага сходу народных прадстаўнікоў Чжан Дэцзянам. Прадуктыўная праца кітайскіх дэлегацый у Мінску прадвесціць візіт Аляксандра Лукашэнкі ў КНР, ён, як чакаецца, пройдзе ў маі. Парадак візіту актыўна вярстаецца - напярэдадні былі дасягнутыя дамоўленасці па шырокім спектры пытанняў. Сёння ключавой тэмай стала эканоміка, у прыватнасці, узаемадзеянне ў інвестыцыйнай, гандлёвай і фінансавай сферах. Бакі адзначылі высокі ўзровень палітычных адносін, якія з кожным годам становяцца больш трывалымі, пры гэтым яны павінны стаць і закладам паспяховых дзелавых сувязяў і тым самым падцягнуць эканоміку дзвюх краін. Асаблівая ўвага і прыцягненню кітайскіх кампаній у банкаўскі сектар нашай краіны. Так, Беларусь і Кітай дасягнулі папярэдніх дамоўленасцяў аб выхадзе China CITIC Bank на беларускі рынак. Больш падрабязна - Аляксей Адашкін.
Вышэйшым органам дзяржаўнай улады ў Паднябеснай з'яўляецца Усекітайскі сход народных прадстаўнікоў. Гэта парламент, які складаецца з амаль трох тысяч дэпутатаў, які, з слову, і Старшыню КНР выбірае. Гэтая структура праводзіць сесіі раз на год. Увесь астатні час асноўную законатворчую працу на сябе бярэ Пастаянны камітэт Усекітайскага сходу.
Ужо чатыры гады яго ўзначальвае 70-гадовы Чжан Дэцзян. Аўтарытэтны палітык фактычна з'яўляецца трэцяй асобай у дзяржаве - пасля Старшыні КНР і прэм'ер-міністра. Інтэнсіўныя беларуска-кітайскія кантакты на ўсіх узроўнях - яркі прыклад таго, што ў супрацоўніцтве няма закрытых тэм. Літаральна на мінулым тыдні ў Палацы Незалежнасці пабывалі і міністр грамадскай бяспекі Кітая, і генпракурор КНР, і партыйны кіраўнік 70-мільённай правінцыі Хунань. Сёння размова працягнулася ўжо на больш высокім узроўні.
Для беларуска-кітайскага ўзаемадзеяння цяперашні год юбілейны. Краіны адзначаюць 25-годдзе ўстанаўлення дыпламатычных адносін. За чвэрць стагоддзя Мінск і Пекін здолелі пабудаваць раўнапраўнае і ўзаемавыгаднае партнёрства. Два гады таму, і гэта ўпершыню ў гісторыі, выходзіць 5-ая дырэктыва Прэзідэнта, прысвечаная супрацоўніцтву з Кітаем. У ёй дакладна па пунктах усё: ад інтэграцыі галін і прадпрыемстваў да рэгіянальнага ўзаемадзеяння. Сёння Мінск і Пекін звязваюць дзясяткі інвестпраектаў - а гэта тысячы новых рабочых месцаў, уласны легкавы аўтапрам, сумеснае заваяванне космасу, і ў фінансах - льготныя і камфортныя крэдыты.
Візіт у Мінск старшыні Пастаяннага камітэта праходзіць у рамках еўрапейскага турнэ парламенцкай дэлегацыі. У праграме яшчэ Латвія, Літва і Расія. Але менавіта ў Беларусі госці з Паднябеснай правялі больш за ўсё часу.
А гэта важны сігнал ва ўсходняй дыпламатыі. Асобны час уплывовы кітайскі палітык надаў наведванню індустрыяльнага парку "Вялікі камень", які будуецца.
Мінскі і Пекінскі праспекты на карце Беларусі з'явіліся зусім нядаўна. Індустрыяльны парк "Вялікі камень" пачалі будаваць тры гады таму. У гэтым пункце недалёка ад сталіцы Беларусі ўдала перасякліся эканамічныя інтарэсы нашай краіны з глабальнай ініцыятывай Паднябеснай па стварэнні Шаўковага шляху 21 стагоддзя.
Плануецца, што 2017 год для парку стане прарыўным. Інфраструктура падрыхтаваная, настаў час актыўна прыцягваць рэзідэнтаў, запускаць вытворчасць і атрымлліваць прыбытак.
І Мінск, і Пекін не ўтойваюць, што сумесны індустрыяльны парк - праект яшчэ і палітычны. Гэты толькі пачатак, першы крок на шляху да будучых больш маштабных ініцыятыў. Бакі настроеныя дзейнічаць аператыўна і адважна ісці да пастаўленых мэт.
Узровень узаемадзеяння паміж дзвюма дзяржавамі сёння беспрэцэндэнтна высокі. Вялікую ролю ў гэтым выконваюць і асабістыя адносіны лідараў Беларусі і Кітая. Аляксандр Лукашэнка 9 разоў наведваў Паднябесную з візітамі. Сяброўства з Сі Цзіньпінам стала надзейным фундаментам для пабудовы сумеснай эканомікі.
Адной з яе апор будзе "Вялікі камень". У перспектыве гэта свабодная эканамічная зона дазволіць Беларусі атрымліваць ад экспарту дадаткова да 50 мільярдаў долараў штогод. Сёння ў парку восем рэзідэнтаў. Да канца года іх колькасць павінна павялічыцца да 20 кампаній.
Сёння сумесныя беларуска-кітайскія праекты можна знайсці практычна ў кожным рэгіёне краіны. У Добрушы вось-вось пачне працаваць сучасны камбінат па вытворчасці ўпакоўкі, у які інвестары з Паднябеснай уклалі каля 350 мільёнаў долараў.
Калі гэта машына пачне працаваць на поўную магутнасць, на заводзе ў Добрушы будуць атрымліваць 600 тон гатовай прадукцыі за суткі. За год - 200 тысяч тон. Гэтага хопіць, каб цалкам закрыць і патрэбнасці краіны, і істотна павялічыць экспарт.
Гэта адна з самых сучасных вытворчасцяў кардона ў свеце. Частка абсталявання - кітайская, частка - па ліцэнзіях вядомых французскіх і аўстрыйскіх кампаній. На прадпрыемстве плануецца стварыць 600 новых рабочых месцаў. Юлія Радзевіч на фабрыку трапіла па размеркаванні 9 гадоў таму. І тады малады спецыяліст прыняла рашэнне застацца ў Добрушы. Сустрэла тут будучага мужа, затым у сям'і з'явілася дачка. Сёння Юлія ўжо начальнік цэха.
Ужо летам тут плануюць атрымаць доследную партыю кардона. Новая вытворчасць зменіць не толькі эканамічную сітуацыю ў раёне, але і сам Добруш. Ужо адрамантаваныя дарогі, масты, будуецца жыллё. Акрамя таго, з запускам прадпрыемства падатковыя адлічэнні ў бюджэт вырастуць амаль на 200%.
Сёння Беларусь рэалізуе больш як 30 інвестпраектаў, на якія кітайскія кампаніі накіравалі каля 6 мільярдаў долараў. Зацікаўленыя мы і ў росце тавараабароту. Летась гэты паказчык перавысіў два з паловай мільярды долараў. Баланс узаемнага гандлю не ў нашу карысць - імпарт перавышае экспарт.
Аднак рынак вялізнага Кітая з кожным раўндам міждзяржаўных перамоў раскрываецца ўсё шырэй для беларускіх тавараў. Таму сітуацыя выпраўляецца. Тавараабарот у пачатку гэтага года павялічыўся прыкладна на трэць, у той час, як наш экспарт вырас на ўсе 88%.
Аб актывізацыі ўзаемнай эканомікі сёння з высокім госцем з КНР гаварылі і ва ўрадзе. Прасоўванню новых ініцыятыў і нарошчванню супрацоўніцтва будзе садзейнічаць візіт беларускага Прэзідэнта ў Кітай, які адбудзецца ўжо ў наступным месяцы. Эксперты дзвюх краін дбайна рыхтуюць шэраг новых праектаў да гэтых перамоў.
Усе сустрэчы, якія Чжан Дэцзян правёў у Беларусі гэтымі днямі, былі максімальна дэталёвымі і грунтоўнымі. З беларускім лідарам высокі госць з Паднябеснай абмеркаваў як двухбаковыя адносіны, так і пытанні міжнароднага парадку. У праграме кітайскага палітыка знайшоўся час і для далучэння да беларускага мастацтва. У Палацы Незалежнасці кіраўнік парламента КНР азнаёміўся з персанальнай выставай пейзажыста Валерыя Шкарубы. Чжан Дэцзян асабліва адзначыў глыбокі лірыка-філасофскі змест прац жывапісца.
Падарункам уласнага аўтарства сустрэў сёння высокапастаўленага палітыка з Паднябеснай дырэктар Нацыянальнага мастацкага музея Беларусі. Вернісаж стаў заключным пунктам насычанай праграмы парламенцкай дэлегацыі. КНР у спісе краін, жыхары якіх могуць прылятаць да нас без віз. Беларусь асабліва зацікаўленая ў павелічэнні ліку гасцей з дружалюбнага Кітая. Дарэчы, менавіта кітайскія турысты сталі самымі шчодрымі ў свеце, патраціўшы летась за мяжой 260 мільярдаў долараў.
