Якім павінен быць новы парламент, абмяркавалі ў Палацы Незалежнасці

Парламент іграе вялікую ролю для стабільнасці грамадства. Пра гэта заявіў Аляксандр Лукашэнка, калі прымаў з дакладам Старшыню Палаты прадстаўнікоў Нацыянальнага сходу Уладзіміра Андрэйчанку. Цяперашні склад завяршае працу: фінальная сесія Палаты прадстаўнікоў шостага склікання адкрыецца 2 кастрычніка. У пастаянных камісіях знаходзіцца на разглядзе 60 пытанняў. Асноўная задача дэпутацкага корпусу - прыняцце пакета бюджэтных дакументаў на наступны год. Якраз зараз парламентарыі ў профільных камісіях працуюць над прагнозам-2020 і бюджэтам сумесна з урадам і Мінфінам. Аляксандр Лукашэнка лічыць важным паскорыць гэтую працу, каб да пачатку фінансавага года былі зацверджаныя важныя для краіны дакументы. Гаворачы пра будучы парламент, Прэзідэнт выказаў меркаванне, што там павінны быць прадстаўленыя ўсе пласты грамадства.

Цяперашні склад Палаты прадстаўнікоў сур'ёзна папрацаваў над умацаваннем заканадаўчай базы і міжнароднага аўтарытэту Беларусі. Парламент - гэта сур'ёзная школа. Такіх прафесіяналаў нельга страціць, і тыя, хто захоча працаваць, павінны знайсці сабе ўжыванне ў дзяржаўных органах, лічыць Прэзідэнт.