У першы дзень верасня Беларусь адзначае Дзень ведаў. Больш за 3 000 школ па ўсёй краіне прымуць вучняў у гэтым навучальным годзе. Прэзідэнт Аляксандр Лукашэнка адрасаваў віншаванне з Днём ведаў навучэнцам, студэнтам, аспірантам, настаўнікам і навукова-педагагічным працаўнікам.
"Гэтае свята ўвасабляе непарыўную сувязь пакаленняў, перадачу мудрасці і вопыту ад бацькоў дзецям, ад настаўнікаў - вучням. Ва ўсе часы беларусы шанавалі адукаванасць, майстэрства і прафесіяналізм, а сёння менавіта гэтыя якасці з'яўляюцца гарантыяй дабрабыту і ўстойлівага развіцця краіны", - падкрэсліваецца ў віншаванні.
Кіраўнік дзяржавы адзначыў, што ў Беларусі надаюць вялікую ўвагу захаванню лепшых традыцый айчыннай педагогікі, удасканаленню сістэмы навучання і выхаванню маладога пакалення.
Асобная ўвага ў віншаванні нададзена і педагогам.
"Быць настаўнікам - гэта прызначэнне і лёс. Ад вашых прафесійных навыкаў і ўзроўню падрыхтоўкі залежаць дасягненні вучняў, а актыўная грамадзянская пазіцыя падкрэслівае ролю настаўніка ў грамадстве", - адзначыў Аляксандр Лукашэнка.
