Прэзідэнт Беларусі, Старшыня Усебеларускага народнага сходу Аляксандр Лукашэнка па селектарнай сувязі заслухаў даклад намесніка старшыні УНС Аляксандра Косінца і начальніка сакратарыята Валерыя Міцкевіча.
У развіццё першага пасяджэння VII Усебеларускага народнага сходу беларускі лідар паставіў шэраг задач, акрэсліўшы галоўныя пытанні, над якімі неабходна працаваць у рамках новага канстытуцыйнага органа. Па-першае, Аляксандр Лукашэнка даручыў наладзіць сістэму працы з дэлегатамі УНС па вертыкалі: старшыня - намеснік - сакратарыят - дэлегаты УНС. У склад сходу ўваходзяць каля 1200 дэлегатаў. Гэта людзі самых розных сацыяльных груп, уключаючы дэпутатаў мясцовых саветаў, прадстаўнікоў грамадзянскай супольнасці. "Сістэма працы з імі павінна быць наладжана, - так Прэзідэнт акрэсліў адну з галоўных задач. - Не ад сходу да сходу, а на пастаяннай аснове, уключаючы інфармаванне дэлегатаў, зваротную сувязь, графік сустрэч і гэтак далей".
Што датычыцца выбудоўвання структуры для арганізацыі працы УНС, то яна павінна быць мінімальнай, але, безумоўна, эфектыўнай. У сувязі з тым што асноўны орган, які займаецца арганізацыйнай працай УНС, (яго сакратарыят) будзе невялікім, пастаўлена задача арганізаваць сістэму ўзаемадзеяння з дзяржорганамі, губернатарамі, мясцовымі органамі ўлады, суб'ектамі грамадзянскай супольнасці.
