Сёння адбылася тэлефонная размова Аляксандра Лукашэнкі з Прэзідэнтам Азербайджана Ільхамам Аліевым. Кіраўнікі дзяржаў пацвердзілі стратэгічны характар двухбаковага супрацоўніцтва - разгледзелі ход рэалізацыі дамоўленасцяў, дасягнутых падчас перамоў двух прэзідэнтаў у красавіку ў Баку, абмеркавалі перспектывы ўдзелу беларускіх кампаній у рэалізацыі маштабных узаемавыгадных праектаў на тэрыторыі Азербайджана.
Аляксандр Лукашэнка прывітаў той факт, што год таму завяршылася шматгадовае супрацьстаянне паміж Азербайджанам і Арменіяй, асабліва звярнуў увагу на важнасць распачатага працэсу мірнага будаўніцтва, які ідзе на карысць абедзвюм краінам. Таксама Прэзідэнт Беларусі падкрэсліў, што аднаўленне транспартных камунікацый і эканамічнага ўзаемадзеяння на Паўднёвым Каўказе павінна стаць асновай трывалага міру ў рэгіёне і забяспечыць дабрабыт і бяспеку ўсіх народаў, якія там пражываюць.
Беларускі лідар выказаў спачуванні родным і блізкім усіх ахвяр шматгадовага карабахскага канфлікту і адзначыў выключную важнасць прынятай год таму пры пасрэдніцтве Расіі заявы, якая спыніла кровапраліцце.
Аляксандр Лукашэнка паведаміў свайму калегу, што ў знак дружбы беларускага і азербайджанскага народаў у Мінску будзе ўстаноўлены помнік выхадцу горада Гянджа, выдатнаму паэту і мысляру Нізамі Гянджэві. Сёлета яго 880-годдзе шырока адзначаецца ў Азербайджане і за мяжой.
