У Палацы Незалежнасці пройдуць адразу два найбуйнейшыя саміты - ЕўрАзЭС - ён ужо стартаваў сёння, і СНД - ён адкрыецца заўтра. У беларускую сталіцу прыбылі прэзідэнты двух інтэграцыйных блокаў. У Нацыянальным аэрапорце Мінск сустракалі кіраўнікоў Расіі, Казахстана, Таджыкістана, Арменіі, Украіны, а таксама кіраўніка дэлегацыі Кыргызстана. Адразу па прылёце кіраўнікі дзяржаў адправіліся ў Палац Незалежнасці, дзе прайшло пасяджэнне ў вузкім фармаце тройкі: Беларусь, Расія і Казахстан, а затым да іх далучыліся лідары іншых дзяржаў для сустрэчы ў пашыраным складзе.
Ля Палаца Незалежнасці працуе наш палітычны аглядальнік Андрэй Крывашэеў (прамое ўключэнне). Вялікі палітычны марафон інтэграцыі стартаваў сёння тут, у новым будынку Палаца Незалежнасці. Першае пасяджэнне ў вузкім фармаце еўразійскай тройкі - Беларусь, Расія і Казахстан - адкрыла шырокую праграму самітаў на вышэйшым узроўні. Дзень сённяшні прысвечаны Мытнаму саюзу і Адзінай эканамічнай прасторы. На заўтра намечаны рэгіянальны саміт Садружнасці Незалежных Дзяржаў.
Адразу адзначым, што пачатку першага пасяджэння тройкі нам прыйшлося пачакаць. Справа ў тым, што да афіцыйнага адкрыцця прэзідэнты Беларусі, Расіі і Казахстана сустрэліся без прэсы і абмеркавалі парадак дня. Гэтая сустрэча для нас была нечаканай, але, як паказала першае ж пасяджэнне, надзвычай прадуктыўнай. Як адзначыў беларускі лідар ва ўступным слове, саюзнікам атрымалася выпрацаваць ключавыя прынцыпы інтэграцыі, а шурпатасці, што ўзніклі, - гэта праблемы росту, усе яны пераадольныя.
Найважнейшы міжнародны складальнік мінскага саміту стаў без перабольшання сенсацыяй. Арменія і Кыргызстан, паводле слоў беларускага лідара, гатовыя ўвайсці ў інтэграцыйны праект. Ён стаў прывабным на сусветнай арэне. Тут беларускага лідара падтрымалі калегі. Прэзідэнты Казахстана і Расіі агучылі галоўныя прапановы сённяшняга дня. Да еўразійскай інтэграцыі гатова далучыцца наймагутная эканоміка і стратэгічны партнёр Еўрасаюза - Турцыя (дарэчы, член НАТА), а зону свабоднага гандлю з Мытным саюзам жадае развіваць такі гігант як Індыя. Калі ўсе праекты (я маю на ўвазе Арменію, Кыргызстан, Турцыю і Індыю) будуць паспяховымі - гэта пашырыць геаграфію еўразійскай інтэграцыі амаль у два разы. А па колькасці насельніцтва, эканамічным патэнцыяле і перспектывах яна перавысіць магчымасці Еўрапейскага саюза. Гэта значыць еўразійства з праекта рэгіянальнага мае ўсе шанцы стаць праектам глабальным. Я прапаную паслухаць тыя самыя сенсацыйныя заявы трох лідараў, якія прагучалі тут, у Палацы Незалежнасці.
Акрамя безумоўнага прагрэсу еўразійскай інтэграцыі прагучала на мінскім саміце і нямала крытыкі. Аляксандр Лукашэнка падкрэсліў: у Мытным саюзе і АЭП замест устранення бар'ераў і выключэнняў парадаксальна ўзнікаюць новыя - гэта тармозіць інтэграцыю.
Прэзідэнт Казахстана раскрытыкаваў работу камісіі Мытнага саюза. Яна зацягвае выкананне рашэнняў кіраўнікоў дзяржаў, пры гэтым просіць новых паўнамоцтваў. З аднаго боку, паводле слоў Назарбаева, на 80% узгоднена інвестыцыйная частка дагавора аб Еўразійскім саюзе, з другога - беларускае малако і казахстанскае мяса сутыкаюцца з бар'ерамі пры пастаўках у Расію. А транзіт электраэнергіі і ўвогуле блакіруецца.
Нягледзячы на аб'ектыўную крытыку, Еўразійская інтэграцыя дэманструе відавочны поспех. Тры эканомікі растуць, няхай і павольней, чым чакалася, а тавараабарот са знешнімі рынкамі за 8 месяцаў ужо перавысіў 600 мільярдаў долараў. Калі ўлічыць, што ўсе партнёры ў Еўропе і Амерыцы перажываюць глыбокую дэпрэсію і крызіс, - гэта выдатны вынік інтэграцыі.
У гэтыя хвіліны ідзе пашыранае пасяджэнне еўразійскай тройкі з удзелам прэзідэнтаў Украіны, Таджыкістана, Арменіі і кіраўнікі дэлегацыі Кыргызстана. Ад гэтай сустрэчы аналітыкі чакаюць прынцыповых рашэнняў, у першую чаргу па ўкраінскім пытанні, і выразнасць са стратэгіямі ўваходжання ў інтэграцыйны блок афіцыйных Бішкека і Ерэвана.
Мы працягваем сачыць за работай мінскага саміту на вышэйшым узроўні, больш падрабязная інфармацыя з'явіцца ў нас праз некалькі гадзін да вячэрняга выпуску інфармацыйнага канала Панарама.
Андрэй Крывашэеў быў на прамой сувязі са студыяй ад Палаца Незалежнасці. Там сёння адкрыўся саміт ЕўрАзЭС. Дні вялікай палітыкі працягнуцца і заўтра - у новым Палацы Незалежнасці збяруцца кіраўнікі дзяржаў Садружнасці Незалежных Дзяржаў. Ну, а напярэдадні саміту ў прэзідэнт-гатэлі ў Мінску ў гэтыя хвіліны звяраюць пазіцыі кіраўнікі знешнепалітычных ведамстваў краін СНД. Падрабязней, як праходзіць сённяшні дзень высокай палітыкі ў беларускай сталіцы, глядзіце ў рамках інфармацыйнага канала Панарама.
