АБСЕ для Беларусі застаецца важным партнёрам па шматлікіх пытаннях міжнароднага парадку дня. Пры гэтым афіцыйны Мінск разлічвае на далейшае цеснае супрацоўніцтва з Парламенцкай асамблеяй АБСЕ. Сёння пра гэта заявіў спікер ніжняй палаты парламента Уладзімір Андрэйчанка на сустрэчы са спецыяльным прадстаўніком ПА АБСЕ па Усходняй Еўропе Кентам Харстэдам. Беларусь - актыўная ўдзельніца арганізацыі. Адзначаны значны ўклад нашай краіны ў працу Парламенцкай асамблеі, у прыватнасці, высокі ўзровень правядзення летняй сесіі ў Мінску. Уладзімір Андрэйчанка падкрэсліў, што на парадку дня практычна ўсіх пасяджэнняў асамблеі - рэзалюцыі, падрыхтаваныя беларускім бокам. Найбліжэйшыя сустрэчы таксама не стануць выключэннем.
Уладзімір Андрэйчанка, Старшыня Палаты прадстаўнікоў Нацыянальнага сходу Беларусі: "Самае галоўнае, што ўсе рэзалюцыі, якія прапануе Беларусь, носяць аб'яднальны характар. Яны не накіраваны супраць кагосьці, яны накіраваны менавіта на ўмацаванне даверу, развіццё шматбаковага дыялогу. Усё гэта робіцца ў імя стабільнасці, у імя міру. Сёння наша дэлегацыя таксама рыхтуецца прыняць удзел у вясновай сесіі ў Вене і летняй сесіі ў Берліне. Мы зноў рыхтуем рэзалюцыю. Яна накіравана на барацьбу з тэрарызмам, а таксама ў сферы кібербяспекі".