Тут працягваецца міжнародная канферэнцыя па бяспецы. Яе ўжо назвалі самай прадстаўнічай і насычанай за ўсе 52 гады існавання форуму. Галоўная тэма сённяшняга дыялогу - сітуацыя ва Украіне і выкананне мінскіх дамоўленасцяў. Менавіта саміт "нармандскай чацвёркі" ў беларускай сталіцы год таму стаў адпраўным пунктам да мірнага ўрэгулявання ўкраінскага крызісу. У праграме форуму таксама абмеркаванне будучыні НАТА, міжнародная роля Кітая, энергетычная бяспека і фінансавыя войны. Пра ўсё па парадку наш спецыяльны карэспандэнт у Мюнхене Аляксей Адашкін.
У другі дзень мюнхенскай канферэнцыі фокус увагі зрушыўся з Сірыі ва Украіну. Менавіта сёння з трыбуны форуму выступіў украінскі прэзідэнт Пётр Парашэнка. А ўжо з самай раніцы, у 8:15 па мясцовым часе, у сталіцы Баварыі прайшла сустрэча міністраў замежных спраў "нармандскай чацвёркі".
Аднак перамовы Сяргея Лаўрова, Пятра Клімкіна, Франка-Вальтэр Штайнмаера і Нікаля дэ Рыўера прадоўжыліся менш за гадзіну і завяршыліся, як было заяўлена, без асаблівага выніку. У цэнтры ўвагі ўдзельнікаў было ўрэгуляванне крызісу на Данбасе і далейшыя крокі па рэалізацыі мінскіх дамоўленасцяў. Бакам атрымалася ўмовіцца аб наступнай сустрэчы ў сакавіку ў Парыжы - гэта, бадай, адзіная дамоўленасць, аб якой сёння паведамілі. На гэтым фоне асабліва каштоўнымі выглядаюць вынікі леташняга дыпламатычнага марафону ў беларускай сталіцы.
Мінск сёння як ніколі часта ўспаміналі на гэтым самым прэстыжным ваенна-палітычным форуме свету. Беларускія міратворчыя намаганні адзначылі і па годнасці ацанілі ў першую чаргу на ўсіх узроўнях еўрапейскай дыпламатыі.
Для абмеркавання пытанняў вайны і міру, а таксама сумеснай пабудовы бяспечнай архітэктуры геапалітыкі ў Мюнхен прыехалі каля трыццаці кіраўнікоў дзяржаў і ўрадаў, а таксама прыкладна 70 міністраў абароны і замежных спраў. З улікам журналістаў і экспертаў "Баварскі двор" - так завецца 175-гадовы гранд-гатэль - у гэтыя дні прымае больш як паўтысячы чалавек. Беларускую дэлегацыю, як і летась, узначальвае міністр замежных спраў Уладзімір Макей. Лічыцца, што асаблівую каштоўнасць мюнхенскай канферэнцыі надае магчымасць правядзення шматлікіх двухбаковых сустрэч. Для гэтага ў гасцініцы "Баерышэ-хоф" арганізаваныя спецыяльныя перагаворныя. З нямецкімі партнёрамі кіраўнік беларускага знешнепалітычнага ведамства гаварыў на адной мове, без перакладчыкаў. Але геаграфія кантактаў за два дні выходзіць далёка за межы ФРГ.
У замежнай прэсе ўжо назвалі цяперашні мюнхенскі форум самым прадстаўнічым і самым насычаным. За ўсе 52 гады існавання гэтай дыскусійнай пляцоўкі. Вайна ў Сірыі, крызіс ва Украіне і праблема бежанцаў у Еўропе - гэта ключавыя тэмы. Аднак праграма канферэнцыі нашмат шырэйшая. Сёння ў сталіцы Баварыі абмяркоўвалі будучыню НАТА, міжнародную ролю Кітая, энергетычную бяспеку і нават фінансавыя войны.
Планета пад пагрозай наступлення эры глабальнай нестабільнасці. З такім несуцяшальным прагнозам выступілі эксперты мюнхенскай канферэнцыі напярэдадні пачаткі форуму. У гэтыя дні ў сталіцы Баварыі спрабуюць зрабіць так, каб песімістычнае апісанне будучыні засталося толькі на паперы.
