У Брэсце сотні мігрантаў з Чэчні паблізу памежнага перахода арганізавалі сапраўдны лагер. Штодня яны спрабуюць перасекчы мяжу, каб у Еўрасаюзе атрымаць статус бежанцаў. Ва ўсіх розныя прычыны, па якіх яны пакінулі свае дамы, але адзіная мэта - пошук лепшага жыцця. Але вось ужо некалькі месяцаў мігранты застаюцца за бортам - польскія ўлады пакуль насустрач не ідуць. Вікторыя Патоня - прадоўжыць.
Яны не саромеюцца паказваць пашпарты, але хаваюць твары. Гавораць: асцерагаюцца за сваё жыццё. Стомленыя, напаўгалодныя, якія ідуць да мэты любым шляхам. Каля двухсот мігрантаў з Чэчні проста на газоне ля пункта пропуска "Брэст" разбілі стыхійны лагер. Ні ў кога няма віз, але ёсць вялізнае жаданне трапіць у Польшчу і атрымаць статус бежанцаў.
Ніхто не парушае грамадскага парадку. У асноўным тут жанчыны і дзеці. Просіць дапамогі і два тыдні штурмуе мяжу з хворым сынам на руках і Эліна Алімхаджыева.
Павелічэнне патоку мігрантаў у Брэсце адзначана з красавіка. І шторанку, як на працу, першым цягніком на Цярэспаль яны імкнуцца за кардон.
Штодня толькі адгэтуль, са станцыі "Брэст", спробы трапіць у Еўрасаюз у пошуках лепшага жыцця прадпрымаюць каля пяці сотняў чалавек. У асноўным гэта грузіны і чэчэнцы, якія дамагаюцца статусу бежанцаў. Але на баку сумежнай дзяржавы дазваляюць застацца толькі адзінкам.
За паўгода з брэсцкага вакзала мігранты з Чэчні ажыццявілі больш за 30 тысяч спроб трапіць у Еўропу. Але палякі не спяшаюцца праяўляць сардэчную гасціннасць: 90% мігрантаў разварочваюць назад. Статус бежанцаў у Польшчы прысвойваюць паводле Жэнеўскай канвенцыі. На праверку інфармацыі па кожным кандыдаце сыходзіць парадку двух тыдняў. Нярэдкія выпадкі, калі за гэты час яны нелегальна, нягледзячы на забароны, аказваюцца ўжо ля меж Германіі, каб яшчэ раз папрасіць прытулку.
Дзмітрый Біткалюк, в.а. начальніка аддзялення памежнага кантролю "Брэст-пасажырская станцыя": "Дадзеную катэгорыю грамадзян мы прапускаем нароўні з грамадзянамі Рэспублікі Беларусь, бо яны з'яўляюцца грамадзянамі Расійскай Федэрацыі, а мы знаходзімся ў Саюзнай дзяржаве. Плюс наяўнасць або адсутнасць візы замежнай дзяржавы не з'яўляецца падставай для няпропуску ў Беларусі".
Згодна з законам, грамадзяне Расіі ў нашай краіне бесперапынна могуць знаходзіцца 90 сутак. Жыхары прымежных гарадоў да міграцыйных патокаў таксама ставяцца па-рознаму.
У стыхійным лагеры спадзяюцца, што польскі бок іх пачуе і дапаможа. За сітуацыяй сочаць пагранічнікі, міграцыйныя службы, Чырвоны Крыж, а таксама ў генеральным консульстве Расіі ў Брэсце.
Аляксандр Тамашоў, начальнік упраўлення па грамадзянстве і міграцыі УУС Брэсцкага аблвыканкама: "Дадзеная катэгорыя замежных грамадзян праз Брэст-Цэнтральны едзе з 2000 года. Гэта ўжо, пэўна, трэцяе пакаленне якое туды едзе. Плюс паток пастаянна ішоў і ідзе. Прымаецца толькі вызначаная колькасць людзей туды, на тэрыторыю Польшчы. Як правіла, да 20 чалавек".
