ЦВК: Міжнародным назіральнікам будуць накіраваны запрашэнні

Каменціруючы нараду, што прайшла ў Кіраўніка дзяржавы, Лідзія Ярмошына адзначыла, што гэтае мерапрыемства традыцыйнае. У перыяд правядзення выбарчай кампаніі заўсёды ёсць пытанні, якія патрабуюць вырашэння на вышэйшым узроўні. Абмеркавалі аказанне практычнай дапамогі Цэнтрвыбаркаму для арганізацыі работы  са зваротамі грамадзян. Падтрымку тут акажуць прадстаўнікі парламента і Нацыянальнага цэнтра заканадаўства і прававых даследаванняў. Акрамя таго,  у цэнтры ўвагі было  і пытанне накіравання запрашэнняў міжнародным назіральнікам.

Лідзія Ярмошына, Старшыня Цэнтральнай камісіі Беларусі па выбарах і правядзенні рэспубліканскіх рэферэндумаў: "Гэта наша звычайная практыка. Усе выбары ў краіне праходзяць пры шырокім міжнародным назіранні. Выпрацоўваецца алгарытм дзеянняў для запрашэння міжнародных назіральнікаў. Было прынята рашэнне, што па меры паляпшэння эпідэміялагічнай сітуацыі  ў краіне Міністэрствам замежных спраў будуць накіраваны адпаведныя запрашэнні ў міжнародныя арганізацыі, якія традыцыйна назіраюць за нашымі выбарамі: гэта БДІПЧ, АБСЕ і СНД. Аднак адбудзецца гэта, я думаю, пасля  завяршэння працэсу рэгістрацыі кандыдатаў у прэзідэнты. Спадзяюся, да гэтага моманту эпідэміялагічная сітуацыя палепшыцца".

Ішла размова  і аб працы інфармацыйнага цэнтра, які традыцыйна ствараецца ў дзень выбараў у Палацы Рэспублікі. Уся аператыўная інфармацыя аб ходзе галасавання будзе агучвацца там.