Пра адзін з такіх заняткаў - Таццяна Кашпур.
Гэту дружную сям'ю цяжка назваць дамаседамі. Сумесныя паходы і вандроўкі на веласіпедах - на першым месцы ў спісе планаў на выхадныя. Тата і мама часам нават шкадуюць, што ў іх няма вачэй на патыліцы і лішняй пары рук: усачыць за шасцю хлопчыкамі і дзяўчынкамі - задача не з простых.
Каб дапамагчы сям'і Ніціеўскіх зрабіць свой адпачынак не толькі максімальна прыемным, але і бяспечным, у госці да іх прыйшлі супрацоўнікі ДАІ і МНС разам з юнымі памочнікамі. Яны дакладна ведаюць, што лепш за ўсё запамінаюцца тыя ўрокі, якія праходзяць з задавальненнем. Таму прыйшлі не з пустымі рукамі. Ратавальнікі расказалі дзеткам, як паводзіць сябе ў выпадку бяды і прапанавалі адчуць сябе барацьбітамі з агнём . А для нагляднасці прынеслі рэчы з пажару і сапраўдную, правераную ў схватцы з полымем амуніцыю байцоў МНС.
Як паводзіць сябе па дарозе ў школу і не толькі, малых вучылі юныя інспектары дарожнага руху. Госці правялі своеасаблівы экзамен, на якім дзеці разгадвалі загадкі і рэбусы на тэму бяспекі дарожнага руху. Мяркуючы па колькасці заробленых кожным прызоў, выпрабаванне пройдзена на выдатна. А пасля таго, як у іх рукі трапіла настольная гульня Я вадзіцель, таксама падарунак ДАІ, іх увагу ўжо немагчыма было прыцягнуць ні паветранымі шарамі, ні нават смачным тортам.
Алена Волчак, прэс-афіцэр ДАІ Фрунзенскага раёна г. Мінска: Правілы дарожнага руху можна вучыць і дома. Часам не хапае такой навочнай інфармацыі, нейкіх кніжак. Мы ўсім, чым маглі, дапамаглі.
Акрамя самага важнага тэлефона на ўсе выпадкі жыцця - нумара сваёй мамы, дзеці запомнілі яшчэ 4 экстранныя: 101 , 102, 103 і 104. Абяцалі глядзець на дарогах па баках і трымацца за рукі. А старэйшыя сыны запэўнілі, што гатовыя заўсёды быць прыкладам малодшым. Тым больш, што ў мамы ў жывоціку расце прыбаўленне - сёмае дзіця ў сям'і. Будзе з кім падзяліцца ведамі.
Кампаніі Стань прыметным у цемнаце і Моладзь за бяспеку, можна сказаць, у самым разгары. Наперадзе яшчэ шмат працы. У планах дарожных інспектараў і ратавальнікаў наведаць з цікавымі ўрокамі сацыяльны прытулак у Фрунзенскім раёне і дзіцячы дом № 5.
З пачатку года на дарогах Мінска здарылася амаль 50 аварый з удзелам дзяцей да 16 гадоў. Па віне хлопцаў і дзяўчат - толькі 10. Яскравы прыклад таго, што і нам, дарослым, яшчэ шмат чаму варта навучыцца. Напрыклад, усталёўваць аўтамабільныя крэслы і быць вельмі ўважлівымі на пешаходных пераходах. Гэта ўжо зусім іншая школа - школа жыцця. І ў ёй не можа быць памылак.
