Пуск ракеты з пілатуемым караблём "Саюз МС-25" да Міжнароднай касмічнай станцыі адменены. Экіпаж павінен быў стартаваць 21 сакавіка ў 16:21, аднак запуск не адбыўся.
На борце карабля знаходзіліся касманаўт Алег Навіцкі, удзельніца касмічнага палёту з Беларусі Марына Васілеўская, астранаўт NASA Трэйсі Дайсан. Экіпаж вярнуўся ў гасцініцу.
Папярэдне запуск "Саюза МС-25" перанесены на суботу, 23 сакавіка, на 15:36. Паводле звестак спецыялістаў Цэнтра кіравання палётамі, адмена старту адбылася ў аўтаматычным рэжыме на этапе зваротнага адліку.
Варта адзначыць, што ў касманаўтыцы такія моманты не з'яўляюцца чымсьці экстраардынарным і здараюцца перыядычна. Запуск касмічнага карабля - гэта вялікі зладжаны працэс, але не заўсёды па тэхнічных прычынах старты бываюць удалымі. На першым месцы бяспека экіпажа.
На касмадроме Байканур працягвае працаваць здымачная група Агенцтва тэленавін. Карэспандэнт Анастасія Бенедзісюк - з падрабязнасцямі.
Дзень вызначаны. Гэта будзе субота, 23 сакавіка, у 17:36 па мясцовым часе, 15:36 па мінскім. Стан здароўя ў экіпажа - Марыны Васілеўскай, Алега Навіцкага і Трэйсі Дайсан - добры. Усе тонкасці і тэхнічныя нюансы таго, што здарылася падчас сённяшняга старту, пракаменціравалі прадстаўнікі Раскосмасу.
Юрый Барысаў, гендырэктар дзяржкарпарацыі "Раскосмас":
Мы высветлілі прычыну. Была прасадка напружання хімічнай крыніцы току. Экіпаж здаровы. Нават у гэты перыяд у Васілеўскай пульс быў 66, яны людзі падрыхтаваныя і вытрыманыя. У нас ёсць адпаведны рэгламент і інструкцыі на гэты конт. І ніякай панікі няма.
Сяргей Крыкалёў, выканаўчы дырэктар дзяржкарпарацыі "Раскосмас" па пілатуемых праграмах:
Спрацавала аўтаматыка пры кантролі сістэм карабля, высветлілася анамалія. Зараз разбіраемся з прычынай гэтай анамаліі. Раней былі сітуацыі, звязаныя з тым, што спыняўся старт у аварыйным рэжыме. На шчасце, аўтаматыка спрацавала і не дапусціла далейшай няправільнай работы сістэм карабля. Экіпаж у бяспецы.
Члены экіпажа пакінулі карабель у скафандрах і адправіліся пераапранацца.
