Выпускнікі гэтага цэнтра прадставяць беларуска-італьянскую школу прафадукацыі на Сусветнай алімпіядзе ў Бразіліі. Пра гэта гаварылі сёння ў Мінску падчас перагавораў кіраўніцтва Міністэрства адукацыі нашай краіны і дэлегацыі Сардзініі. Адным з галоўных пытанняў стала і ўзаемадзеянне ў навуковай сферы. У планах - сумесная праца ў галіне нана- і біятэхналогій.
Міжземнаморскае цяпло сярод зімы ў Мінску - і справа нават не ў тэмпературы за акном. У гэтай зале лета, і не толькі таму, што на экране сонечна, а, хутчэй, таму, што адносіны такія. Не проста дзелавыя, а ўжо даўно і сяброўскія.
Джузепе Карбоні, ганаровы консул Беларусі ў Сардзініі (Італія): Супрацоўніцтва сапраўднае, не эпізод, але канкрэтная доўгая гісторыя сяброўства і супрацоўніцтва. Дзякуючы ўсёй гэтай працы, якую мы зрабілі, нават усе гэтыя культурныя мерапрыемствы дапамагаюць пазнаць адно аднаго лепш.
Пазнаёміцца бліжэй з культурай рэгіёну і нават на паўтары гадзіны аказацца на востраве сёння змаглі некалькі дзясяткаў беларусаў - Дні Сардзініі пачаліся ў Беларусі з кінапрэм'еры.
Кінастужка Арбітр аб італьянскім захапленні - футболе, і, вядома, каханні. Гэта не проста адзін з лепшых фільмаў Венецыянскага кінафестывалю, які ўпершыню прэзентуюць у Беларусі, гэта гісторыя аб Сардзініі. Насамрэч, супрацоўніцтва аўтаномнага рэгіёну і нашай краіны ўжо даўно больш, чым культурныя сувязі, сёння ў Мінску абмяркоўваюцца і некалькі амбіцыйных эканамічных праектаў.
Сярод самых перспектыўных - супрацоўніцтва ў галіне турызму, у Беларусі плануюць адкрыць некалькі сардзінскіх аграсядзіб. Але ўжо сёння вядуцца перагаворы аб іншых, больш маштабных праектах.
Аляксандр Самуйліч, дырэктар цэнтра міжнародных сувязяў Міністэрства адукацыі Беларусі: Зараз мы ўжо разглядаем шэраг эканамічных праектаў, якія будуць звязаны са стварэннем сумесных прадпрыемстваў у галіне сельскай гаспадаркі, перапрацоўкі сельгаспрадукцыі.
Зразумела, што і аб самай паспяховай галіне супрацоўніцтва - адукацыйнай - і падчас гэтага візіту не забыліся. Сёння ў Мінску гаварылі і пра 10-гадовы праект Сардзінія Глобал. Некалькі месяцаў таму ў навучальным цэнтры пачалі рыхтаваць і прафесіяналаў у галіне турызму - з сертыфікатам міжнароднага ўзору. А ужо ў наступным годзе выпускнікі змогуць прадставіць беларуска-італьянскую школу прафадукацыі на Сусветнай алімпіядзе ў Бразіліі.
Марка Секі, дырэктар службы міжнародных сувязяў Прэзідыума аўтаномнага рэгіёну Сардзінія: Я думаю, што гэты праект - паказчык таго, што мы можам працаваць сумесна вельмі эфектыўна. Вынікі добрыя, і яны прыкметныя, але, я думаю, што гэта толькі пачатак, спыняцца на дасягнутым мы не плануем.
Не плануюць і беларусы - а значыць, зусім хутка і эканамічныя праекты з паперы ўвасобяцца ў жыццё. Бо, як высветлілася, тры тысячы кіламетраў для адносін Беларусі і Сардзініі не адлегласць.
