Такую думку сёння выказаў кіраўнік Дэпартамента адукацыі Савета Еўропы Шур Берган на сустрэчы з беларускім міністрам адукацыі. Своеасаблівы топ рэкамендацый, неабходных нашым універсітэтам для далучэння да Еўрапейскай прасторы вышэйшай адукацыі, можа з'явіцца ўжо пасля наведвання нашай краіны міжнароднымі экспертамі. Акрамя міністэрства, дэлегацыя спецыялістаў Савета Еўропы за 2 дні наведала некалькі беларускіх універсітэтаў. Галоўная мэта такіх форумаў - маніторынг і ацэнка гатоўнасці далучэння сістэмы вышэйшай адукацыі да Балонскага працэсу. Таксама для гэтага сёння спецыялісты сустрэліся са студэнтамі Белдзяржуніверсітэта. Падрабязнасці ва Улады Карніцкай.
Павелічэнне колькасці міжнародных праграм, удзел студэнтаў у кіраванні ўніверсітэтам і, вядома, двухступеньчатая адукацыя. Усё гэта - новаўвядзенні-2014 у беларускай сістэме адукацыі. Сёння іх у галоўным адукацыйным ведамстве краіны прэзентавалі замежным калегам - камісіі па Балонскім працэсе.
Міхаіл Жураўкоў, Міністр адукацыі Беларусі: "Міжнародныя эксперты адзначаюць, што Беларусь у прынцыпе гатовая. У любой краіне ў Балонскім працэсе няма ідэальнай адпаведнасці гэтых прынцыпаў канвенцыі, якія прапісаныя. У кожнай краіны ёсць свае асаблівасці. Па вялікім рахунку мы ўсе патрабаванні гэтыя выконваем".
Ужо пасля экспертам паказваюць, як тое, што прэзентавалі, працуе на практыцы. Адно з апошніх ноу-хау вышэйшай школы - студэнцкае самакіраванне. І да таго ж адзін з галоўных прынцыпаў Балонскага працэсу. Зараз кожны студэнт можа прыйсці да аднакурсніка, напрыклад, па дапамогу ў вырашэнні любога пытання - ад матэрыяльнай дапамогі да выдзялення інтэрната.
Яўген Харук, старшыня студэнцкай асамблеі Беларускага дзяржаўнага ўніверсітэта: "Самае галоўнае - студэнту выказваць сваё меркаванне і каб гэта меркаванне даходзіла да ўпраўлення ўніверсітэта. Для гэтага і існуюць органы самакіравання, якія дапамагаюць даносіць гэта меркаванне і вырашаць яго на самых верхніх узроўнях".
Сёння толькі ў Белдзяржуніверсітэце студэнтам на выбар прапаноўваюць больш за 50 міжнародных праграм. Студэнцкая і выкладчыцкая мабільнасць - яшчэ адзін прынцып Балонскага працэсу. Ён у Беларусі, на думку спецыялістаў, выконваецца ў поўнай меры, больш за тое, менавіта на нас у гэтым пункце можна раўнавацца дзякуючы новай ідэі.
Адна з ініцыятыў, якая прагучала сёння, - стварэнне магчымасці для студэнтаў міграваць паміж універсітэтамі. Для гэтага ў нашай краіне ВНУ ўжо аб'ядноўваюцца, у першую чаргу - профільныя. Такім чынам, студэнты змогуць пераходзіць з аднаго ўніверсітэта ў другі і слухаць лекцыі лепшых выкладчыкаў самых моцных ВНУ краіны.
Балонскі працэс аб'ядноўвае сёння ўніверсітэты ў 47 краінах свету. Сярод іх і нашы суседзі па СНД - Расія, Азербайджан, Арменія і Казахстан. Ён, дарэчы, лічыцца самым маладым удзельнікам, у спіс уключаны ў 2010. У Беларусі ёсць усе шанцы змяніць Казахстан на гэтай пазіцыі - далучыцца да Балонскага працэсу ўжо сёлета.
Шур Берган, кіраўнік Дэпартамента адукацыі Савета Еўропы: "Калі мы знаходзімся тут, то мы сур'ёзна разглядаем уступленне Беларусі ў Балонскі працэс, інакш нас тут не было б. Мы ўражаныя многімі людзьмі, студэнтамі і прафесарска-выкладчыцкім складам, з якімі сустрэліся, менавіта іх прафесіяналізмам".
Свае рэкамендацыі па ўдасканаленні беларускай сістэмы адукацыі спецыялісты назавуць 24 сакавіка ў Рызе на пасяджэнні па Балонскім працэсе. Не выключана, што менавіта тады будзе распрацавана спецыяльная дарожная карта, можна сказаць, пакрокавая інструкцыя, дзякуючы якой Беларусь сёлета зможа рэалізаваць свой шанц стаць удзельнікам Еўрапейскай прасторы вышэйшай адукацыі.
