3 Ліпеня беларусы адзначаць па традыцыі з размахам. Святочныя мерапрыемствы пройдуць ва ўсіх кутках краіны. Нашы карэспандэнты ўжо азнаёміліся з праграмай.
На сувязь выходзяць рэгіёны. Расказвае Андрэй Ястрабаў. Буйніцкае ратнае поле - сімвал гераічнасці чырвонаармейцаў і гараджан, якія ў 1941 годзе 23 доўгія дні стрымлівалі ворага на подступах да Магілёва. Менавіта адсюль будзе дадзены старт усім афіцыйным мерапрыемствам дня. Ля мемарыяла збяруцца сотні людзей, каб падтрымаць акцыю "Беларусь памятае" і ўшанаваць хвілінай маўчання памяць герояў Вялікай Айчыннай, якія загінулі за незалежнасць краіны. Ля капліцы лягуць жывыя кветкі. З гэтага моманту ў канцэртныя і тэматычныя пляцоўкі ператворацца ўсе паркі горада. У скверы імя Герцэна разгорнецца сапраўдны палявы кінатэатр, тут жа будуць частаваць гасцей свята салдацкай кашай. На пешаходнай вуліцы Магілёва выступяць лепшыя самадзейныя калектывы. Цэнтральнай сцэнай стане плошча Зорак. Вялікая праграма для дзяцей у парку “Падніколле”. Танцавальны вечар пад жывы аркестр у парку 40-годдзя Перамогі ля фантанаў. І, вядома, святочны марш воінскіх часцей Магілёўскага гарнізона на плошчы Славы. Ён адкрые вялікі святочны канцэрт з удзелам легендарных "Пясняроў" і папулярнага гурта NaviBand, які завершыцца салютам над Дняпром і агульнарэспубліканскай акцыяй "Спяём гімн разам".
Расказвае Ганна Кавалёва. Святочны марафон у Гомелі сёння прадоўжыцца больш за 15 гадзін. Яго праграму рыхтавалі некалькі тыдняў. Вынікам стануць дзясяткі розных пляцовак па ўсім горадзе. На іх - мастацкія выставы, канцэрты, паказы ваенных фільмаў і экспазіцыі рэтратэхнікі. Дзень пачнецца з гучнага акцэнту - урачыстага шэсця па галоўнай магістралі горада. Да калоны па традыцыі далучацца ветэраны, гараджане і кіраўніцтва рэгіёна. Тут чакаецца некалькі дзясяткаў тысяч людзей. Усе яны стануць удзельнікамі акцыі "Беларусь памятае". Затым гулянні ахопяць увесь горад. Арганізатары рыхтуюць адкрыццё новага памятнага знака, шмат фотазон, спартыўна-забаўныя пляцоўкі і нават караоке-праграму "Лепшыя песні пра галоўнае". Аматараў мілітары па традыцыі запросяць на выставу ваеннай тэхнікі, самых маленькіх жыхароў Гомеля - у дзіцячы гарадок. А на стадыёне "Цэнтральны" выступяць Валерый Сюткін і гурт "Цягні-Штурхай".
Расказвае Вольга Маслоўская. У Віцебску сёлета ўпершыню святочнае шэсце пройдзе па новым маршруце. Працоўныя калектывы, спартсмены, моладзь пранясуць сцягі ўсіх гарадоў і раёнаў рэгіёна да плошчы Перамогі па Маскоўскім праспекце - адной з галоўных гарадскіх артэрый, дзе размешчаныя дзве ВНУ і некалькі школ. Шэсце ўзначаліць факел Перамогі, яго даставяць з Лёзна - першага населенага пункта, вызваленага ў Прыдзвінні. Мітынг і ўскладанне кветак ля Вечнага агню на плошчы Перамогі, а затым самая відовішчная частка свята - злучэнні Віцебскага гарнізона пройдуць урачыстым маршам перад тысячамі гледачоў. Упершыню сярод парадных разлікаў будуць войскі тэрытарыяльнай абароны, сфарміраваныя на базе Бешанковіцкага раёна. Парад завершыць дэманстрацыя ваеннай тэхнікі. Сотні людзей далучацца да акцыі "Беларусь памятае". У розных кутках рэгіёна да манументаў і помнікаў воінам-вызваліцелям лягуць жывыя кветкі. А ветэраны каторы раз пачуюць словы падзякі за мірнае неба над галавой.
