Цягнікі "Гарадскіх ліній" Беларускай чыгункі звязалі Мінск са Смалявічамі

6 Лістапада 2015

Гэта ўжо трэці этап у развіцці транспартных зносін паміж сталіцай і гарадамі-спадарожнікамі. Сучасныя электрычкі ўжо курсіруюць у Заслаўе і Рудзенск. Новы расклад цягнікоў "Гарадскіх ліній" з Мінска на Смалявічы вывучыў Аляксей Кандраценка.

Cталічны горад-спадарожнік Смалявічы стаў яшчэ больш блізкім. Прынцып сатэліта - заўсёды быць даступным - увасобіла гарадская электрычка. Сёння яна стартавала са станцыі Мінск-Пасажырскі. 40 хвілін з камфортам і вы ў Смалявічах. Многія пасажыры ўжо ацанілі надзейнасць і хуткасць цягнікоў.

Білеты можна набыць у касах, спецыяльных тэрміналах, а таксама ў саміх вагонах цягніка. Кошт праезду ў рамках канцавых станцый - 7 тысяч 800 рублёў. Ужо з заўтрашняга дня цягнікі "Гарадскіх ліній" будуць штодзень ажыццяўляць 3 рэйсы з Мінска ў Смалявічы і 4 - у зваротным напрамку і рабіць толькі 6 прыпынкаў: Мінск-Усходні, Трактарны, Сцяпянка, Азярышча, Калодзішчы і Гарадзішча.

Андрэй Кашко, першы намеснік начальніка пасажырскай службы Беларускай чыгункі: "Адзін з гэтых цягнікоў яшчэ будзе звязваць участак Беларусь - Смалявічы. Гэта значыць ён будзе звязваць праз Мінск-Пасажырскі гарады-спадарожнікі. Далей у нас у перспектыве адзнака пасажырапатоку і нарошчванне аб'ёмаў перавозкі менавіта "Гарадскімі лініямі".

На паўночна-ўсходнім напрамку за апошні час абнавілі 25 кіламетраў чыгуначных пуцей, адрамантавалі 4 пераезды, новы від набылі адразу некалькі станцый.

Свежыя фасады і інтэр'еры будынка і ў станцыі Смалявічы. Дарэчы, менавіта адсюль пасажыры магілёўскага і віцебскага напрамкаў могуць трапіць у Нацыянальны аэрапорт, абыходзячы сталіцу.

З моманту адкрыцця рэгулярнага руху гарадскія электрычкі перавезлі больш за 9 мільёнаў пасажыраў. Наступны крок - Фаніпаль і Дзяржынск. Перспектыва сувязі з гэтымі гарадамі-спадарожнікамі - да 2020 года.