Сёлета павуціна ліўневых магістраляў сталіцы павялічылася на два з паловай кіламетры. Такім чынам сталіцу рыхтуюць да адлігі пасля зімы. Новыя метры труб – самы эфектыўны спосаб пазбегнуць падтапленняў. Адкрыты летась калектар пад Нямігай прайшоў іспыт на трываласць – упершыню вуліца за год ні разу не апускалася пад ваду. Каб разгрузіць трубы, з іх актыўна вычышчаюць смецце. Дапамагае ў гэтым спецыялістам ачышчальная тэхніка і нават робат. За падрыхтоўкай ліўневых каналізацый да зімы назіраў Ян Пашкевіч.
Так маленькага і жвавага робата рыхтуюць да чарговага апускання пад зямлю. Чатырохколавы “інспектар” дасканала аглядае сталічныя калектары. Кіруе разумнай машынай Вольга Семянчэня. Камера відэаназірання дапамагае зазірнуць у кожны куток падземных магістраляў.
Генеральную ўборку робяць менавіта напярэдадні маразоў – пакуль дно трубы не пакрылася лёдам. Асноўная частка смецця трапляе ў калектары з дарог. Спецыяльная тэхніка дапамагае сабраць пясок і пыл у адным месцы.
Гэта машына сапраўдны ўніверсальны прыбіральшчык. Вось гэтая прылада апускаецца пад зямлю і па шлангу падаецца вада напорам 200 атмасфер. Такая вадзяная “ракета” прабівае залежы пылу і пяску і адначасова вымывае ўсё смецце. Такім чынам за адзін падыход можна ачысціць да 150 метраў ліўневых камунікацый.
За раз машына можа выпампаваць амаль 14 тон глею. Праз спецыяльныя фільтры вада ачышчаецца і зноў падаецца пад зямлю. А смецце вывозяць на звалку.
Ліўневыя камунікацыі расцягнуліся больш чым на 300 кіламетраў. Падчас моцных дажджоў яны часам не спраўляюцца з воднымі патокамі. Таму адказныя службы сталіцы пастаянна пракладваюць дадатковыя падземныя трубы ці аднаўляюць старыя. Так, напрыклад, у раёне Нямігі новая ветка калектара дазволіла мінімізаваць падтапленні.
Усяго ў Мінску ў зоне рызыкі - больш за сто месцаў, якія пасля моцнага ліўня могуць пераўтварыцца ў венецыянскія вулачкі. Каб смецце не забівала трубы, будуюць і новыя ачышчальныя вадасховішчы. Праз два гады самае вялікае з іх з’явіцца на вуліцы Інжынернай. Вялікі фільтр будзе ачышчаць амаль трэць бруднай вады горада.
