Нацыянальная грашовая адзінка Беларусі пасля дэнамінацыі ўмацуецца, і гэта палепшыць імідж нашай эканомікі ў вачах замежных інвестараў - такое меркаванне выказаў сёння старшыня Камітэта дзяржкантролю. Леанід Анфімаў наведаў адкрытае акцыянернае таварыства "Малако". На сустрэчы з калектывам кіраўнік ведамства гаварыў і пра важную падзею, у чаканні якой знаходзіцца зараз грамадства. Гэта Пяты Усебеларускі народны сход. Менавіта прамысловасць павінна стаць асновай развіцця краіны ў наступныя пяць гадоў. Аднак вытворцы павінны дакладна ведаць, дзе іх прадукцыю чакаюць, адзначыў Леанід Анфімаў. Дарэчы, віцебскі перапрацоўшчык малака палову аб'ёмаў адгружае на экспарт. У асноўным гэта рэгіёны Расіі.
Леанід Анфімаў, старшыня Камітэта дзяржкантролю Беларусі: "Так структура эканомікі пабудаваная, што яна будзе з'яўляцца лакаматывам для таго, каб наша эканоміка развівалася эфектыўна і дынамічна. Вядома, акцэнт павінен рабіцца на комплексных падыходах да развіцця прамысловага комплексу краіны. Менавіта такіх прадпрыемстваў перапрацоўчай галіны, машынабудаўнічых прадпрыемстваў. Але пад пэўныя рынкі збыту".
Кіраўнік кантралюючага ведамства правёў асабісты прыём працаўнікоў прадпрыемства. Пытанні былі розныя: прыватызацыя жылых памяшканняў, добраўпарадкаванне тэрыторыі, арганізацыя транспартнай сувязі і аказанне медыцынскай дапамогі. Некаторыя праблемы былі вырашаныя яшчэ да заканчэння прыёму.
