У Беларусі пачаліся ўрачыстасці, прысвечаныя 71-й гадавіне Перамогі ў Вялікай Айчыннай вайне. Пачаліся яны з маштабнага форуму, які аб'яднаў тых, хто гэтую перамогу здабываў. Здабываў цаной неймаверных намаганняў і, хутчэй, насуперак, чым дзякуючы... І сёння, праз гады, яны аб'ядналіся, каб успомніць. Расказвае Дзіяна Равякова.
Гармонік і танцы пад "Сінюю хустачку". Гэта не кадры з ваеннага кінафільма. Сёння ў Мінску акунуцца ў атмасферу памятнага 45-га мог кожны. Каля Нацыянальнага алімпійскага камітэта самае моладзевае грамадскае аб'яднанне краіны арганізавала інтэрактыўныя пляцоўкі, якія нагадалі, як радаваліся амаль 71 год таму той самай Вялікай Перамозе!
Форум пераможцаў пачаўся задоўга да афіцыйнага адкрыцця ў НАК. Для замежных гасцей, якіх, дарэчы, у Мінск з краін СНД, Балтыі, а таксама Грузіі прыехала больш як тры сотні, арганізатары правялі экскурсію па храме Усіх Святых. А на плошчы Перамогі ў памяць аб тых, хто падарыў усім нам мір, пераможцы ўсклалі кветкі ля Вечнага агню.
Ужо пасля ў зале Алімпійскай славы прэзентавалі адразу тры праекты, якія за гады існавання змянілі статус "нацыянальныя" на "міжнародныя", па сутнасці, кожны з іх - візітная картка краіны.
Міхаіл Швыдкой, спецпрадстаўнік прэзідэнта Расіі па міжнародным культурным супрацоўніцтве: "Гэта не фармальнае мерапрыемства, менш за ўсё нам хочацца, каб яно было фармальным. Таму што патрыятызм - гэта пачуццё чалавечае, гэта не розум, гэта такія эмоцыі чалавечыя. Вельмі хочацца, каб на гэтых сустрэчах старэйшае пакаленне ветэранаў сустракаліся з маладымі, абмяркоўвалі вельмі важныя чалавечыя праблемы. Калі мы жадаем ганарыцца сваімі краінамі, нам трэба памятаць не толькі, што мы зрабілі для саміх сябе, але і для гісторыі ўсяго чалавецтва".
Сярод гасцей форуму апынулася і ўнучка выбітнага савецкага палкаводца Івана Панфілава.
28 байцоў яго дывізіі падчас абароны Масквы здзейснілі подзвіг. За 4 гадзіны бою знішчылі 18 варожых танкаў. Сёння гэтая гісторыя натхняе, у тым ліку на стварэнне патрыятычных праектаў. Адным з такіх стаў "Нас мільёны, панфілаўцаў".
Айгуль Байкадамава, унучка Героя Савецкага Саюза Івана Панфілава: "Калі спрабуюць перапісаць гісторыю Вялікай Айчыннай вайны, вось такія акцыі вельмі важныя ў першую чаргу для моладзі, каб яны ведалі аб подзвігах сваіх продкаў і ганарыліся імі і - самае галоўнае - памяталі, што ў іх цячэ кроў пераможцаў".
З партрэтамі пераможцаў іх родныя пройдуць па вуліцах гарадоў ужо не першы раз. Гэта яшчэ адзін, зараз ужо міжнародны праект - "Бессмяротны полк". Прыдумалі яго 4 гады таму ў Расіі.
А год таму ў Беларусі з'явіўся патрыятычны праект "Кветкі Вялікай перамогі". Падарунак ад юных беларусаў тым, хто абараніў для нас мірнае неба. І сёння яго таксама прэзентавалі на форуме, які аб'яднаў 15 краін.
І сёння ж ідэю нашага нацыянальнага праекта падтрымалі ўсе ўдзельнікі форуму. "Кветкі Вялікай Перамогі" могуць з'явіцца і ў краінах Садружнасці.
Мінск невыпадкова стаў месцам сустрэчы пераможцаў Вялікай Айчыннай вайны. Арганізатары форуму праходзяць яго выключна ў гарадах-героях. Дарэчы, першы форум пераможцаў прайшоў у расійскім горадзе-героі Туапсэ 6 гадоў таму.
І з тых часоў форум традыцыйна становіцца пляцоўкай не толькі абмену ідэямі, але і галоўным рухавіком так званага пошукавага руху. Менавіта тут эксперты распрацоўваюць карту далейшых пошукаў ваенных артэфактаў і, што самае галоўнае, перапахаванняў на тэрыторыях былога Савецкага Саюза.
