Сапраўдны IT-рэкорд. Колькасць рэзідэнтаў Парка высокіх тэхналогій вырасла на чвэрць - плюс 46 кампаній. Сярод іх ёсць як стартапы, так і гучныя імёны. Так, зарэгістраваўся расійскі гігант Mail.Ru - у мінскім офісе яны будуць весці распрацоўку гульнявых праектаў. Больш за палову навічкоў ПВТ створаныя з прыцягненнем замежных інвестыцый. Па сталіцы ўжо ездзіць аўтамабіль і тэсціруе сістэму, якая будзе выкарыстоўвацца ў беспілотніках. Ёсць праекты, звязаныя з новымі трэндамі, - дапоўненая рэальнасць і машыннае навучанне. Дзякуючы новаму Дэкрэту "Аб развіцці лічбавай эканомікі" зараз можна будзе без праблем займацца такімі відамі дзейнасці.
Касцюмы віртуальнай рэальнасці, дроны для адсочвання стану глебы - гэта нашы перспектыўныя стартапы. Іх не пабаяўся ўзяць у свае рады парк і зрабіў гэта хутка і без бюракратыі. У склад ПВТ увайшлі і вопытныя гульцы на рынку, якія аказваюць паслугі прамысловым гігантам у Беларусі і па ўсім свеце. А яшчэ нават не ўступіў у сілу новы дэкрэт ПВТ, адзначае IT-супольнасць. Згодна з яго правіламі пачнецца праца ў канцы гэтага месяца.
Пра новых рэзідэнтаў і магчымасці, што адкрываюцца для эканомікі краіны, раскажа Дзмітрый Цітоў.
Праца ў цемры ды яшчэ з хірургічнай дакладнасцю. Менавіта ў такой атмасферы ствараюцца мабільныя гульні і 3D-анімацыя ў мінскім офісе кампаніі "Каноэ". Камп’ютары ў распрацоўшчыкаў звышадчувальныя да святла, а стылус, як пяро мастака, улоўлівае самыя тонкія дэталі. Маладая кампанія стала рэзідэнтам ПВТ, і супрацоўнікі пачынаюць працаваць над новымі тэхналогіямі, якія становяцца даступнымі дзякуючы рэвалюцыйнаму дэкрэту ПВТ.
Кампанію "Інтэрмех" з трыццацігадовым стажам ведае практычна кожнае наша прамысловае прадпрыемства. Аўтаматычнае вядзенне архіва або кіраванне канструктарскім бюро. Укараніць "разумную сістэму" можна ў любы працэс вытворчасці. Задаволеныя заказчыкі ад БелАЗа да "Беларуськалія". Правераны гулец і на прасторы СНД.
Колькасць рэзідэнтаў Парка высокіх тэхналогій вырасла на чвэрць - плюс 46 кампаній. Гэты рэкорд актыўна каментуюць вядомыя IT-бізнесмены.
Гэты істотны прырост са 192-х да 238-мі рэзідэнтаў адбыўся ўпершыню і яшчэ да ўступлення ў сілу Дэкрэта "Аб развіцці лічбавай эканомікі". Прэзідэнт у канцы мінулага года ўзяў курс на IT-краіну і эфект ужо прыкметны. IT-супольнасць дала высокую ацэнку гэтаму дакументу і адгукнулася сустрэчнымі крокамі.
Варта толькі зашпіліць куртку, і ты ўжо аказваешся ў віртуальным свеце. "Разумная вопратка" перадае адчуванні на адлегласці дзякуючы свайму электроннаму начынню. Зараз можна пабываць у шкуры каўбоя не толькі пры дапамозе пульта кіравання. Касцюм дазваляе адчуць кожную дэталь у гульні, скарачаючы цягліцы на целе чалавека.
Касцюм таксама дазваляе павысіць кваліфікацыю супрацоўніка. Напрыклад, не выходзячы з пакоя, можна пабываць на прамысловым прадпрыемстве і даведацца, з чаго складаецца аўтамабіль.
Беларускі праект Teslasuit усяго за год стаў вядомы ўсяму свету. Яшчэ хутчэй яму ўдалося трапіць у лік рэзідэнтаў Парка высокіх тэхналогій.
Большасць з прынятых у ПВТ новых кампаній створана з удзелам замежных інвестыцый, што адлюстроўвае давер замежных інвестараў. У Мінску ўжо працуюць над начыннем для беспілотнага аўтамабіля, прыйшлі рэзідэнты, якія ствараюць уласны ўнікальны прадукт.
