Спецыялісты сцвярджаюць, што прычына такога перасялення - у павелічэнні колькасці жывёл. У дзікай прыродзе для баброў становіцца ўсё менш свабоднай тэрыторыі. Пакуль чатырохногія госці для гарадской флоры і саміх мінчан асаблівай небяспекі не ўяўляюць, аднак праблема адсялення звяроў па-ранейшаму стаіць востра. Пра тое, як знайсці дом для грызуна - Ілья Цвяткоў.
У Мінску з'яўляюцца новыя пасяленні буйных грызуноў
Эколаг Руслан Шайкін назірае за жыццём бабровых сем’яў ужо не першы год. Паводле яго слоў, колькасць бабра гарадскога павялічылася ў некалькі разоў. Так, у Мінску хаткі і норы жывёл без цяжкасці можна знайсці ў забалочаных участках ракі Свіслач. Асноўная прычына з’яўлення бабра побач з чалавекам ў простай формуле - чым бліжэй да горада, тым далей ад сапраўдных ворагаў.У Беларусі налічваецца звыш 60 тысяч асобін і гэта прыкладна на 10 тысяч больш за норму. Таму тэрыторыі ў звычайным асяроддзі пражывання для бабра становіцца ўсё менш.
Грызуны наносяць шкоду жыхарам Мінскай вобласці
Для жыхароў Мінскай вобласці сем'і баброў - сапраўдная праблема. Для будаўніцтва свайго жылля грызуны могуць выкарыстаць некалькі тон драўніны. Пры гэтым у ход ідуць і пладовыя дрэвы, і кусты на прысядзібных участках.
Каб вырашыць відавочную праблему, работнікі лясгасаў рэгулярна ловяць баброў і перавозяць іх у менш заселеныя рэгіёны.
Выпадкі нашэсця баброў перыядычна адбываюцца ў розных населеных пунктах. А жыхарам буйных гарадоў раяць быць асцярожнымі з грызунамі. Пры сустрэчы не спрабаваць іх карміць і знаходзіцца на бяспечнай адлегласці.