Белтэлерадыёкампанія падпісала пагадненне аб супрацоўніцтве з Арганізацыяй радыё і тэлебачання Ірана

Іван Эйсмант і Абдулалі Алі Аскары дамовіліся аб вытворчасці дакументальных фільмаў, а таксама  аб абмене навінавым кантэнтам. Абяцаюць забяспечыць і дапамогу журналістам пры правядзенні здымак на тэрыторыі дзвюх краін. Акрамя таго, іранская медыякампанія гатовая прапанаваць беларускім студэнтам бясплатнае навучанне, а таксама  стажыроўку журналістаў. Госці з Ісламскай Рэспублікі ўжо сёння падарылі дыскі з лепшымі фільмамі і серыяламі, у тым ліку дакументальнымі, і спадзяюцца ўбачыць іх у эфіры беларускага тэлебачання. 

Абдулалі Алі Аскары, старшыня Арганізацыі радыё і тэлебачання Ірана: "У нас вялізная індустрыя вытворчасці фільмаў. Вялікую ўвагу мы надаём дзецям і ствараем мультфільмы. Акрамя таго, шмат працуем і з моладдзю. Пры тэлерадыёкампаніі ёсць свой універсітэт, дзе навучаюць журналістыцы падрастаючае пакаленне. Для нас вельмі важная сфера адукацыі. Мы маем вялізныя і тэхнічныя магчымасці. У лістападзе мы запрасілі Івана Эйсманта на тэхнічнае пасяджэнне ў Іране".

Іван Эйсмант, Старшыня Белтэлерадыёкампаніі: "Проста ўнікальны вопыт. Вядома, нам вельмі цікавы тэхналагічны момант, як гэта ўсё адбываецца ад вытворчасці мультфільмаў да вытворчасці тэлесерыялаў, як наладжана распаўсюджванне таго кантэнту, які яны ствараюць. Таму гэта была вельмі карысная сустрэча. Я думаю, што нешта з вопыту такога гіганта па тэлевізійных мерках мы прыменім у сябе ў Беларусі".

Белтэлерадыёкампанія супрацоўнічае з Арганізацыяй радыё і тэлебачання Ірана ўжо 17 гадоў. Іранская медыякарпарацыя трансліруе праграмы на 150 тэле- і радыёканалах  як унутры краіны, так і за мяжой. Акрамя таго, штогод стварае і паказвае каля 5 тысяч гадзін тэлешоу, сотні фільмаў і тысячы хвілін мультфільмаў.