У праваслаўных сёння Вербная надзеля. За тыдзень да Вялікадня вернікі ўспамінаюць адну з найважнейшых евангельскіх падзей - Уваход Гасподні ў Іерусалім.
Гэты дзень урачысты і радасны. 2 тыс. гадоў таму ў горадзе сабралася шмат паломнікаў, і ўсе яны радасна сустракалі Хрыста, які ўязджаў на осліку. Падобна на тое, як Ісуса віталі пальмавымі галінамі, сёння ў руках праваслаўных галінкі вярбы і кветкавыя букеты. Іх сімвалічна асвячаюць ва ўсіх храмах, пасля чаго захоўваюць увесь год.
Паводле старажытнага павер'я, яны засцерагаюць жыллё ад бед і дораць здароўе кожнаму, каго па традыцыі лёгка адхвошчуць, прыгаворваючы: "Не я б'ю, вярба б'е, табе здароўе дае".
