Да галоўнай музычнай кульмінацыі застаецца крыху больш за 2 дні. 20 лістапада канкурсанты з 17 краін выйдуць на сцэну Міжземнаморскага канферэнц-цэнтра. Дарэчы, наш удзельнік будзе выступаць 9-м. А сёння ў Сашы Мінёнка і шоу-балета "Сенсацыя" прайшла другая індывідуальная рэпетыцыя.
З конкурснага закулісся рэпартаж Ніны Мажэйкі. Артыст без грыму не артыст. Асабліва, калі гаворка ідзе пра тэлевізійны конкурс. Таму пазіцыя "стыліст" у беларускай дэлегацыі абавязковая. Жанна Лявонава рыхтуе нашу каманду для ўсіх мерапрыемстваў еўратыдня: падтрымлівае сцэнічны імідж і сочыць за тым, каб валасок быў да валаска.
Пасля дозы прыгажосці - на здымачную пляцоўку прама ў холе. Калегі з мальтыйскага тэлебачання знялі заключны эпізод візітоўкі. Дзеці ў рад і на гіраскутарах катаюць пад гімн "Еўрабачання".
З зоны артыстаў - на сцэну. Тым больш што Republic Hall - галоўная сцэна конкурсу - знаходзіцца ўсяго толькі за 50 метраў ад зоны для дэлегацый. Гэта другая індывідуальная рэпетыцыя. Сёння ўдзельнікі дзейнічаюць па выпрацаваным алгарытме: з улікам мінулага прагону. Нумар беларускіх артыстаў апроч яркага графічнага афармлення падтрымаюць дадатковыя спецэфекты - тэхнічныя прыёмы са святлом, а таксама залпы CO2 з гармат прама на сцэне.
Дапоўніць сцэнаграфію беларусаў збіраліся і халоднай піратэхнікай. Але ад гэтай ідэі прыйшлося адмовіцца - будынак Міжземнаморскага канферэнц-цэнтра XVI стагоддзя. Да гісторыі і тэхнікі бяспекі аднесліся з павагай.
Republic Hall даволі кампактная зала - усяго 950 месцаў. Зону перад сцэнай зробяць танцпадлогай яшчэ на 280. Конкурс тэлевізійны, таму і асноўная ўвага карцінцы на экране. Эфект прысутнасці забяспечыць аператар тэлекамеры стэдыкам.
Заўтра ў саліста і балета адразу некалькі прагонаў тэлешоу ад пачатку і да канца. Акрамя таго, генеральная рэпетыцыя на галоўнай сцэне запланавана і для вяшчальнікаў ад кожнай краіны.
