Музыцы прадзедаў даюць новае жыццё гарманісты, якім няма і васямнаццаці гадоў!
У аграгарадку Аношкі, што ў Нясвіжскім раёне, ёсць свая школа мастацтваў, дзе дзяцей з вакольных вёсак вучаць іграць на народных інструментах. Бадай, самы папулярны калектыў тут - «Аношкаўскія музыкі». Існуе ён 19 гадоў, 15 з якіх паспяхова абараняе статус узорнага. Дарэчы, у гэтым калектыве іграюць выключна хлопчыкі. У творах акрамя гармоніка і акардэона гучаць спрадвечна беларускія інструменты: акарыны, дуды і басэтлі. На рэпетыцыі «Аношкаўскіх музыкаў» пабывала Аляксандра Драгун.
Лёша Акулік і Арцём Шаўчэнка вучацца ў адным класе. Пасля заняткаў сябры гуляюць у футбол, займаюцца спортам і асвойваюць нотную грамату ў школе мастацтваў. Пяты год яны іграюць у асноўным складзе ўзорнага ансамбля «Аношкаўскія музыкі».
«Аношкаўскія музыкі» існуюць 19 гадоў, 15 з якіх ансамбль мае статус узорнага. У калектыве – выключна хлопчыкі. Да вялікай сцэны іх пачынаюць рыхтаваць з 6 гадоў.
Летась школа мастацтваў папоўнілася гармонікамі. Гучанне сямі інструментаў «Аношкаўскія музыкі» пакуль выпрабоўваюць на рэпетыцыях. Зараз рыхтуюцца да новага сезона і падбіраюць рэпертуар для калядных канцэртаў.
Не кожны аграгарадок мае ўласную школу мастацтваў. У Аношках яна існуе 30 гадоў. Сёння тут музычную адукацыю атрымліваюць 120 дзяцей.
За год «Аношкаўскія музыкі» даюць да 80 выступленняў. Без ансамбля гарманістаў не абыходзіцца ніводнае раённае свята. Мелодыі з нацыянальным каларытам у выкананні юных гарманістаў ведаюць і за мяжой: у Расіі, Прыбалтыцы, Польшчы, Францыі, Турцыі і Германіі.
