Сёння легендарная маскоўская галерэя прэзентавала беларусам "Залаты век" рускага пейзажнага жывапісу. Шышкін, Левітан, Каровін, Рэпін на тры месяцы ў сценах Нацыянальнага мастацкага музея. Радуе, што нашы фонды змаглі падтрымаць гасцей не менш багатым зборам класікаў. Як шэдэўр Куінджы сустрэўся з айчынным "блізніцай" - аб гістарычнай сустрэчы рэпартаж Іны Пілевіч.
Не заблудзіцца ў трох бярозах і знайсці адрозненні паміж двума варыянтамі шэдэўра. Сёння ў беларускай сталіцы - сустрэча краявідаў-двайнят "Бярозавы гай" Архіпа Куінджы. Рускі мастак, якому Рэпін даў мянушку майстра святла, у пошуках ідэальных колеравых адценняў напісаў некалькі версій аднаго палатна. Зараз два з іх - у фондах Траццякоўскай галерэі і Нацыянальнага мастацкага музея Беларусі. Паводле легенды, карціну-масквічку Куінджы ствараў пры ранішнім святле, мінчанку - пры дзённым.
У адной экспазыцыі з Куінджы Шышкін, Верашчагін, Левітан, Каровін, Саўрасаў. Амаль 6 дзясяткаў палотнаў "Залатой эпохі" рускага жывапісу прыбылі з Траццякоўскай галерэі. Легендарны маскоўскі музей валодае адной з самых буйных у свеце калекцый рускага выяўленчага мастацтва, якая пачала фарміравацца яшчэ да рэвалюцыі. Для Траццякоўкі гэта трэці візіт у Беларусь.
Разам з палотнамі рускіх класікаў з Масквы прыбылі і творы беларусаў з сусветным імем. Ураджэнец Гродзенскай губерні Станіслаў Жукоўскі - яркая фігура рускага імпрэсіянізма. А выхадзец з Міншчыны Фердынанд Рушчыц вучыўся ў Шышкіна і ўвайшоў у гісторыю як майстар сімвалічнага краявіду.
У беларускай сталіцы на тры месяцы ўз'ядналіся "Сонца" і "Месяц" Рэпіна. Так легендарны мастак называў партрэты сваёй дачкі Надзеі, напісаныя пры промнях дзённага і начнога свяцілаў. Палотны створаныя з розніцай у чатыры гады ў сядзібе "Здраўнёва" пад Віцебскам. Сёння яны належаць дзвюм розным калекцыям - Траццякоўкі і Нацыянальнага мастацкага.
Усяго ў беларускага фонду 11 карцін Рэпіна. А ў цэлым калекцыя рускага жывапісу налічвае паўтары тысячы адзінак. У верасні Траццякоўка чакае Нацыянальны мастацкі музей з візітам у адказ - прэзентаваць карціны Валянціна Сярова.
