У Вялікім тэатры Беларусі - адразу некалькі юбілеяў і дзяржаўных узнагарод. Новая выстава ў музеі Сучаснага выяўленчага мастацтва, канцэрты на філарманічнай сцэне ў адзіным выкананні.
Падрабязнасці і эксклюзівы ад творчых людзей - у рубрыцы «Праменад» з Ларысай Гулякевіч.
Нарэшце вярнуўся наш беларускі балет з гастроляў па Германіі. Таму на сцэне Вялікага тэатра ўжо сёння - «Трыстан і Ізольда», «Балеро» і «Кармен-сюіта». У нядзелю - прэм'ерны балет Яўгена Глебава «Маленькі прынц». А вось заўтра - опера «Пікавая дама».
У Вялікім тэатры Беларусі пачынаецца паказ легендарных оперных пастановак з удзелам народнага артыста Беларусі Уладзіміра Пятрова. Гэтымі днямі ён адзначае 60-гадовы юбілей. 30 гадоў з якіх ён прысвяціў яе вялікасці сцэне. Самы значны падарунак - урадавая узнагарода - ордэн Францыска Скарыны. Каронныя ролі Уладзіміра - героі-арыстакраты Яўген Анегін і Дон Жуан у аднайменных операх, граф Рэната ў «Балі-маскарадзе», Граф ды Луна ў «Трубадуры», Эскамільё ў «Кармэн», Князь Ялецкі ў «Пікавай даме», якая даецца 30 студзеня. Па персанальных запрашэннях Пятроў выступаў на сцэнах оперных тэатраў Германіі, Швейцарыі, Польшчы, Францыі, Ірландыі, Кітая, Ізраіля, Іспаніі, Расіі.
Дарэчы, Скарынінскім медалём узнагароджаны галоўны рэжысёр Вялікага тэатра Беларусі Міхаіл Панджавідзе.
Упершыню Нацыянальны цэнтр сучасных мастацтваў Беларусі адкрывае для шырокай публікі свае музейныя фонды. Праект "Засекі" адчыняе дзверы ў свае фондасховішчы і знаёміць з сучаснымі шэдэўрамі.
Экспазіцыя складаецца з набыткаў 2015 года - 120 работ у розных відах сучаснага выяўленчага мастацтва: жывапіс, графіка, скульптура, мастацкае фота, кераміка, габелен, шкло. Сярод іх творы ўжо прызнаных майстроў, такіх як: Уладзімір Зінкевіч, Мікалай Кузьміч, Анатоль Кузняцоў, Алег Ладзісаў, Канстанцін Селіханаў, Барыс Семілетаў, Уладзімір Слабодчыкаў, Павел Татарнікаў і таленавітай моладзі: Сяргей Аганаў, Марыя Барысенка, Сяргей Ждановіч, Максім Калтыгін, Вольга Рэднікіна, Іван Семілетаў, Кацярына Сумарава, Раман Сустаў, Вольга Шкаруба, Ірына Шчасная, Тамара Шэлест і многія іншыя. Сёння гэта сучаснае мастацтва, а праз дзесяцігоддзі па гэтых карцінах крытыкі будуць ацэньваць стан беларускага жывапісу пачатку 21 стагоддзя.
Белдзяржфілармония запрашае ў суботу на канцэрт вядомага італьянскага гітарыста Аніела Дэзідэрыа, сусветнага лідара па гітарным выкананні. А ў нядзелю Вялікая філарманічная зала прапануе аматарам класікі канцэрт твораў Моцарта.
Ансамблю «Камерныя салісты Мінска» сёлета 15 гадоў. Але музыканты не заўсёды ў такім вялікім складзе. Яны запрашаюцца кіраўніком Дзмітрыем Зубавым на выкананне разнажанравых музычных праграм, якія выконваюцца толькі адзін раз. Так, у нядзелю канцэрт будзе прысвечаны не вельмі распаўсюджаным творам Моцарта.
Нясумных выхадных і да наступнай пятніцы ў сталічным "Праменадзе".
