Творы аднаго з самых дарагіх мастакоў свету ў арыгінальнай тэхніцы выканання выстаўлены ў Мінску. Густаў Клімт - знакаміты аўстрыйскі мастак, які праславіўся сваёй любоўю да выкарыстання каштоўных металаў на палотнах і майстэрскімі жаночымі партрэтамі. У беларускай сталіцы экспануецца амаль шэсцьдзясят рэпрадукцый Клімта ў так званай паўнаметражнай тэхніцы капіравання. Надзея Сербіненка пра венскі авангард.
"Макавае поле", "Тры ўзросты жанчыны", "Сяброўкі", "Пацалунак". Усё гэта Клімт. Знакаміты аўстрыец, лідар венскага авангарду, чыё імя непарыўна звязанае са стылем мадэрн. Палотны Клімта ўваходзяць ў дзясятку найбольш дарагіх карцін свету. Адзін амерыканскі калекцыянер набыў для сваёй галерэі партрэт "Адэлі Блох-Баўэр" за рэкордныя 135 мільёнаў долараў. Гэты знакаміты твор - жывапісную рэпрадукцыю карціны - цяпер можна ўбачыць у Мінску.
На выставе амаль трыццаць рэпрадукцый карцін і столькі ж малюнкаў - мінімалістычных замалёвак Клімта алоўкам на паперы. У цэнтры галерэі твор, па якім і пазнаюць мастака.
Гэта адна з самых знакамітых карцін Клімта пад назвай "Пацалунак". Напісаны ў пачатку ХХ стагоддзя, твор адносіцца да так званага залатога перыяду мастака. Рэч у тым, што на палатне Клімт актыўна выкарыстоўвае сапраўднае сусальнае золата.
Рэпрадукцыі, прадэманстраваныя ў Мінску, - дакладныя копіі арыгіналаў. Залатое пакрыццё таксама сапраўднае. Ад бюджэтнага спосабу - проста надрукаваць карціны - стваральнікі выставы адмовіліся.
У Мінску выстава прабудзе да сярэдзіны лютага. Потым экспазіцыя адправіцца ў сусветнае турнэ. Клімта ўжо чакаюць у Берліне, Санкт-Пецярбургу, Маскве, Нью-Ёрку і Дубаі.
