Вялікі тэатр чакаюць вялікія перамены, а Тэатр эстрады хутка стане прадзюсарскім цэнтрам. На калегіі Міністэрства культуры абмеркавалі перспектывы і акцэнты працы. Чакаецца ўнясенне змен і дапаўненняў у Кодэкс аб культуры, пошук бязвыплатнай інвестарскай дапамогі для ўстаноў і мадэрнізацыя арт-праектнай дзейнасці. Асаблівая ўвага - маладым рэжысёрам і вакалістам. Абмяркоўваюць і з'яўленне ў наступным годзе нацыянальнага конкурсу ў фармаце тэлепраекта "Голас": ідзе размова пра куплю франшызы шоу. У арт-плане культурнага ведамства - Трыенале сучаснага мастацтва, рэгіянальныя фестывалі і конкурс рэжысёрскіх эксплікацый.
Юрый Бондар, Міністр культуры Беларусі: "Нам вельмі важна сёння знайсці баланс інтарэсаў паміж высокім мастацтвам і пазабюджэтнай дзейнасцю. Установы культуры павінны зарабляць, таму часам ва ўстановах праводзяцца розныя выставы. Безумоўна, за гэтым усім працэсам зарабляння сродкаў мы павінны не забываць пра галоўнае прызначэнне нашых устаноў культуры: гэта выхаванне, эстэтычнае выхаванне нашага насельніцтва".
У зале Нацыянальнай бібліятэкі назвалі імёны лаўрэатаў рэспубліканскага конкурсу "Чалавек года". Горадам культуры па выніках 2018-га стаў Гомель.
